Si e gënjejnë Lulin degët e PD

17 Mars 2019, 17:34, Aktualitet CNA

Dje në mesditë Opozita organizoi një protestë, që për shumë eksponentë të saj, militantë apo pjesëmarrës, ishte nga më të mëdhat në historinë e Shqipërisë.

Por, ndoshta Lulzim Basha, kur ka pasur protesta të vërteta Shqipëria nuk ka qenë fare aty.

Pasi më e madhja, ndoshta në historinë e Shqipërisë, do të ngelet ajo e vizitës së sekretarit amerikan të Shtetit, James A. Baker, në Shqipëri dhe e dyta ndoshta ?Nano ik?, por gjithsesi përtej kësaj më shumë se sa, për të debatuar rreth një madhësie të protestës, ajo që u duk dje ishte stili i gënjeshtër dhe mashtrimi se si degët e PD gënjenin qendrën apo vetë kjo e fundit tentonte të hidhte shifra publike në media për të fryrë, nxitur qytetarët apo numrin e pjesëmarrësve në protestë.

Për shembull, dje zyrtarisht sipas të dhënave nga të dhënat e Partisë Demokratike u deklarua se nga Korça ishin nisur 4500 qytetarë.

Pra do të duheshin që të niseshin të paktën 90 autobuzë, apo në qoftë se do t’i merrnim më pak 50 autobuzë të mëdhenj dhe 2500 persona që të vinin me vetura, do të duheshin rreth 600 vetura apo 700.

Mjaftonin këto mjete për të hyrë në kryeqytet nga rruga e Elbasanit për të bllokuar trafikun për të ndenjur aty dhe për të rrëzuar Qeverinë.

Dhe për ta vërtetuar se kjo ishte një gënjeshtër zyrtare e organizimit të Lulzim Bashës dhe PD së Korcës, po sjellim një foto të publikuar nga deputetja demokrate, Ledina Aliolli.

Kjo foto është bërë menjëherë, sapo protestuesit e Korçës janë mbledhur në krah të kryeministrisë afër hotel”Rogner”-it. Në foto janë të gjithë përfaqësuesit e ardhur me autobuza, apo me mjete private. Mjafton të shikosh këtë dhe e kupton se janë 100 apo 150 maksimumi dhe sikur t’i shumëfishojnë 300 apo 400 sa të duan.

Nga Korça u nisën 1 apo dy autobuza, një furgon 20 vendësh dhe disa mjete private.

Pra, po i themi 200 apo dhe 300, por nuk kanë qenë 4500 aq sa u raportua. Tani kjo foto zbardh gënjeshtrën, e cila kërkon të gjejmë se kush është gënjeshtari.

Është Andrea Mano kryetari i PD së Korçës, i cili ka gënjyer qendrën apo është vetë organizimi i PD, i cili ka gënjyer në opinion publik dhe ka hedhur për të rritur masivitetin dhe pjesëmarrjen e protestës.

Protesta ishte madhështore, kishte mijëra qytetarë që protestonin, por kurrsesi degët e PD nuk duhet ta gënjejnë qendrën për shifrat e pjesëmarrjes.

Apo nga ana tjetër vetë qendra nuk mund të tallet dhe të gënjejë qytetarët, duke të folur për 4500 apo 500 persona të nisur nga Korça, kur në fakt nuk janë nisur as 200.

Do të ishte më mirë që të thuhej e vërteta, të jepej pesha e duhur qytetarëve të Tiranës, që protestojnë apo atyre që vijnë të protestojnë, apo edhe shifrave reale të qytetarëve që protestojnë. /CNA.al