Që Mësonjëtoren mos e mbulojnë skorjet e TEC-it

8 Mars 2019, 12:39, Aktualitet CNA

7 marsi një ditë simbolike dhe me histori për Shqipërinë, fillon nga godina në foto. Patriotët korçarë dhe kolonjarë hapën shkollën e parë shqipe në vitin 1887, Mesonjëtoren për të cilën u derdh aq shumë gjak dhe në mbi një shekull apo 12 dekada aq shumë djersë.

Godina simbol e Korçës ka përballë një tjetër rrezik. Ata që e shohin të bardhe e me gurë që shkëlqejnë ta shikojnë të mbuluar nga karboni që do shkarkojë një TEC i frikshëm që po kërkon të ndërtojë një kompani private në Korçë.

Dikush e mbron TEC-in duke e quajtur shpëtim ekonomik, dikush vendos kushte, por shumica e qytetarëve kanë dalë kundër. Jo vetëm nga padija, por nga fakti se një TEC si ai që po kërkohet të ndërtohet në Korçë emeton në ajer sasi të frikshme CO2 nga djegia e gazit. Pa folur për ujin që shkarkon që sjell ngrohjen dhe ndotjen e atyre nën tokësore.

Mesonjëtorja e Parë Shqipe mund të nxihet nga sasia e karbonit dhe skorjet e atij TEC-i, kompanisë që pretendon ndërtimin nuk i gjenden as zyrat, por thjeshtë ka filluar propagandën dhe ka hedhur hapat e parë për të tentuar të nxijë përfundimisht një rajon të tërë.

Jo pa qëllim sollëm si simbol 7 marsin dhe Mësonjëtoren pas letrës së intelektualëve korçarë drejtuar kryeministrit Rama. Kryebashkiaku Sotiraq Filo ka folur hapur kundër ndëtimit të TEC-it vetëm ka vendosur disa kushte, të parin ndotjen e mjedisit, pas tij ka reaguar kreu i deputetëve të Qarkut Korcë Niko Peleshi edhe ky po me të njëjtin qëndrim. Opozita në Korçë edhe pse e mekur ka folur kundër këtij TEC-i. Pra të gjitha palët duket të jenë kundër. Kush ka kaq forcë dhe kompetenca sa të hedhë hapa para me një projekt të tillë, duke tentuar të ?vrasë? Korçën, korçarët dhe të nxijë Mësonjëtoren e shqiptarëve?

Dhe që kjo të mos ndodhë dhe ky akt kriminal të ndalet pritet që së shpejti të ketë një tjetër organizim qytetar për të treguar se korçarët nuk do lejojnë një krim të tillë, ndërtimin e një TEC-i vrasës në qytetin e tyre./CNA.al

TEC-i, mina me sahat për Korçën

Një TEC vrasës në Korçë

Intelektualët e Korçës kundër TEC-it/ Zbardhet letra drejtuar kryeministrit

Niko Peleshi: Jam kundër TEC-it në Korçë