“Ngec” në rrjetë/ Shkarkohet nga detyra kryegjyqtari me pallat

15 Shkurt 2019, 11:45, Aktualitet CNA

Komisioni i Pavarur i Kualifikimit ka vendosur sot shkarkimin nga detyra të Kryetarit të Gjykatës së Apelit Hysni Demiraj.

Vendimi është marrë pasi sipas KPK-së gjyqtari në fjalë nuk justifikonte pasurinë.

Relatorja e çështjes tha se hetimi për kriterin e pasurisë ishte përqendruar në apartamentin 141 metra katrorë në Tiranë, blerë për 65 mijë euro në bashkëpronësi me bashkëshorten dhe garazh në pallatin ku ndodhet apartamenti, me vlerë 8 mijë euro.

Për këtë pasuri, KPK tha se ka konstatuar që shuma e paguar për apartamentin në raport me sipërfaqen e tij është e ndryshme nga ajo që deklarohet. ?Duket se deklarimi i subjektit për pagesën për metër katror është i pasaktë?, -tha relatorja.

Ndërkohë, për garazhin, ka rezultuar se ka mospërputhje mes deklarimit në deklaratën vetting dhe asaj vjetore për sipërfaqen dhe shumën për blerjen. Komisioni hetoi në lidhje me mundësinë e përfitimit me çmim preferencial të pasurive, për shkak të profesionit të tij.

Nga ky hetim ngrihen dyshime se Demiraj ka përfituar pasuri me çmim më të ulët, duke krahasuar me persona të tjerë që kanë blerë në atë kohë. KPK tha se ka hetuar edhe në lidhje me një hua prej 5 milionë lekësh, marrë në vitin 2006 nga një person.

CNA.al ka zbardhur më parë pasurinë e Demirajt, i cili ka deklaruar se burimin e vetëm të të ardhurave e ka vetëm nga pagat.

Por pavarësisht kësaj, ai ka lidhur një kontratë me një kompani për ndërtimin e një pallati. Bëhet fjalë për vitin 2007.

Nuk dihet se në çfarë vendi do të ndërtohej objekti si dhe vlera e kontratës është jotransprante. Të paktën këto të dhëna nuk janë përfshirë në materialet e publikuara nga Open Spending Albania.

Gjithashtu, Demiraj në karrierën e tij do të mbahet mend për rrahjen e shoferit e tij. Nuk është se dëgjojmë çdo ditë që kryegjyqtarët apo drejtuesit e prokurorive të rrihen me shoferët apo me vartësit e tyre.

Rikujtojmë se në vitin 2016, kryetari i Gjykatës së Apelit ka dhunuar shoferin e tij. Të paktën kështu është raportuar nga Policia e Shtetit në atë kohë.

Për më tepër linqet më poshtë:

Rrahu shoferin e tij/ Kryegjyqtari me pallat, në duar të Vettingut

Kryegjyqtari me pallat/ Filtrohet pasuria e Hysni Demirajt që dhunoi shoferin