Gent Cakaj në krye të Ministrisë së Jashtme/ Albin Kurti “shuplakë” Ramës

4 Shkurt 2019, 12:02, Aktualitet CNA

Kryetari i Lëvizjes Vetëvendosje, Albin Kurti ka udhëtuar ditën e sotme nga Kosova për në Tiranë, për të mbështetur studentët e pedagogët që kanë nisur grevën për plotësimin e kërkesave të tyre.

Ndërkohë, në një prononcim për mediat, Albin Kurti ka komentuar edhe emërimin e Gent Cakaj, në krye të Ministrisë së Punëve të Jashtme.

Kurti theksoi se pas këtij emërimi qëndron Serbia, ndërsa nënvizoi se në Kosovë dhe Shqipëri ka pafund njerëz më të përgatitur dhe më patriot që meritojnë të jenë në krye të diplomacisë shqiptare.

Po ashtu, Kurti nuk ka kursyer edhe gazetarin kosovar Baton Haxhiun, ndërsa u shpreh se ?Baton Haxhiu është një nga njerëzit më të urryer në Kosovë për shkak të lidhjeve të tij me shefin e shërbimit sekret shtetëror serb i cili i ka formuar edhe tigrat e Arkanit dhe shkorpjonët dhe beretat e kuqe, tri formacione famëkeqë që kanë bërë masakra në Kroaci, Bosnje dhe Kosovë. Dhe ky person të ketë kaq shumë ndikim nuk ka shpjegim ndryshe përveçse vazhdon shteti i Serbisë të qëndrojë prapa. Gent Cakaj shpërtheu si rrena. Besoj që edhe në Republikën e Kosovës dhe në Shqipëri ka panumër njerëzish më cilësor, më të përgatitur, më të ditur dhe më patriot që të jenë në krye të politikës së jashtme të Shqipërisë.?.

Gjithashtu, Kurti është pyetur nga gazetarët edhe për darkën e mbrëmshme mes liderve të Kosovës dhe kryeministrit Rama dhe takimit të sotëm Thaçi-Haradinaj, por ai tha se nuk është në dijeni pasi ndodhet në Tiranë prej mbrëmë, por shtoi se ka ardhur koha për një “pranverë shqiptare”.

?Kam ardhur dje në Tiranë dhe nuk i kam ndjekur këto takime. Takimet konjekturale nuk do të mundin të na rritin shumë shpresat për të mirat e përgjithshme. Mendoj se edhe në Kosovë dhe në Shqipërui duhet të fillojmë tqë mendojmë dhe të përgatitemi për një “pranverë shqiptare”. Në kushtet kur ekonomikisht jemi dobët dhe ushtritë i kemi pothuajse inekzistente, ndodhemi në një udhëkryq edhe kohor dhe hapësinor edhe si Ballkan edhe në vitin 2019 është e domosdoshme që populli shqiptar të shfaqet dhe të demokratizojë veten në mbrojtje të detyrës së tij kombëtare për bashkim dhe interesit të tij shtetëror për integrim europian.?-tha ndër të tjera kreu i Vetëvendosjes, Albin Kurti.