Atentat tek dera e lokalit/ Kush ishte biznesmeni që vrau shokun kur ishte 15 vjeç

17 Nëntor 2018, 14:52, Aktualitet CNA

Ngjarja që tronditi mëngjesin e djeshëm qytetin e Elbasanit, pasi një person mbeti i plagosur pas shpërthimit të një granate në derën e lokalit të tij, ka ngritur në këmbë blutë e qytetit.

Dyshohet se ngjarja ku mbeti i plagosur 32-vjeçari, Albert Alterziu ka ndodhur për shkak të hakmarrjes.

?Policia është duke hetuar ngjarjen në pistën e një hakmarrjeje të mundshme, pasi, siç mësohet, i plagosuri ka pasur një të shkuar kriminale. Ai ka kryer dënim për një vrasje, ndërsa në vitin 2013 është plagosur me thikë?,- shkruan Panorama.

Ngjarja, pra vrasja, mësohet të ketë ndodhur në vitin 2001, kur Alterziu ishte në moshën 15-vjeçare.

Pas një sherri, shenjestra e atentatit ka qëlluar me thikë shtetasin Elton Shuli, duke e lënë të vdekur. Viktima ishte shok me autorin dhe ngjarja nisi pas një sherri të çastit mes tyre. Për këtë ngjarje, Alterziu kreu dënimin nga 10 në 7 vjet burg për shkak të moshës së mitur. Por shumë vite më pas (2013), ai u bë edhe një herë protagonist në një sherr mes së rinjsh me thika, ku mbeti i plagosur në këmbë.

Pas kësaj ngjarjeje, i riu nisi të punonte me vëllezërit e tij në një lokal që ka në pronësi familja, ku i’u bë dhe atentati dhe nuk ta të dhëna që të jetë përfshirë në ngjarje të tjera kriminale.

Aktualisht Alterziu është shtruar në spitalin rajonal të qytetit të Elbasanit. Mjekët thonë se gjendja e tij shëndetësore është e rëndë pasi shpërthimi i ka shkaktuar plagë nëpër trup, por, falë ndërhyrjes së shpejtë, e ka kaluar rrezikun për jetën.

Ngjarja

Referuar burimeve policore, Alterziu ka qenë pranë derës së lokalit të tij kur një person i ka shkuar nga mbrapa dhe i ka hedhur te këmbët një granatë. Autori është larguar me shpejtësi duke humbur gjurmët në errësirë, ndërsa shpërthimi i lëndës plasëse i ka shkaktuar plagë të rënda 32-vjeçarit.

Autori ka vepruar shpejt, duke mos i lënë kohë dhe mundësi shënjestrës të vetëmbrohet apo të shohë personin pasi ai ka rënë menjëherë në tokë si pasojë e shpërthimit të granatës. Ka qenë një roje dyqanesh, ai që ka lajmëruar Policinë dhe të afërmit e të riut. I plagosuri është transportuar menjëherë në spital.

Për këtë ngjarje blutë kanë shoqëruar dhe marrë në pyetje rreth 10 persona, por deri më tani nuk ka asnjë të arrestuar për ngjarjen. Ata janë pyetur në cilësinë e personave që mund të kenë dijeni për ngjarjen, por, siç mësohet, dëshmia e asnjërit prej tyre nuk ka qenë ndihmëse për grupin e hetimit.