Shkatërrohet edhe Gjykata e Apelit në Korçë

14 Tetor 2018, 10:10, Aktualitet CNA

Javën e kaluar dy gjyqtarët e Apelit të Korçës nuk mundën të kalonin vettingun. Pra nga 6 gjyqtarë që ka kjo gjykatë tashmë do të ketë 4, përtej sorollatjeve dhe afateve të deritanishme apo dosjeve voluminioze që ka pasur Gjykata e Apelit në Korçë, pritet që koha minimalisht të dyfishohet.

Nuk mundën të kalonin vettingun Entela Prifti, kryetare e Gjykatës dhe Sotiraq Lubonja i cili kandidonte për një post në institucionet e reja të drejtësisë. Nga 6 që ka trupa e gjykatës e Korçës, do të ketë vetëm 4 gjyqtarë.

Pra fillon ngërçi në Gjykatën e Apelit të Korçës.

Kjo gjykatë mund të quhet tashmë e shkërrmoqur. Afatet kohore dhe problematikat e ndryshme do të lindin ditë pas dite, të cilat fillojnë me mungesën e dy gjyqtarëve.

Së pari është e përcaktuar qartë se për të njëjtën çështje tre persona, pra tre anëtarë të trupit gjykues japin masën e sigurisë, dhe duhen tre të tjerë që ta shqyrtojnë atë me themel.

Në Korçë janë 4 gjyqtarë, e nëqoftë se 3 persona japin masën e sigurisë ngelet vetëm një gjyqtar.

Minimalisht do të duhet që të zgjidhet disi çështja, të çohen gjykatës nga Gjykatat e Apelit nga rrethet e tjera, nga Vlora, nga Durrësi apo ndoshta Tirana. Por duke parë situatën që ndodh në gjykatën e Apelit, Tiranë apo në gjykatat e tjera të Apelit ku do të kalojnë në sitë të gjithë kryetarët, shumë shpejt pra në pak kohë, ky ngërç nuk do të jetë vetëm në Korçë, ky ngërç do të kalojë në të gjitha gjykatat e Apelit të Shqipërisë, ku nga dy trupa apo tre trupa gjykuese do të ngelet vetëm një e tillë, deri në momentin që të kalojnë në sitë dhe gjykatësit e tjerë, sepse minimalisht do të goditet një kryetar apo një gjykatës tjetër, çka duket e vështirë me standartin e vendosur nga vettingu kryetarët e gjykatave të Apelit të kalojnë në vetting.

Dhe Korça është e para, pra gjykata e Apelit në Korçë është e para që jep alarmin se pas bllokimit dhe shkatërrimit të gjykatës Kushtetuese dhe gjykatës së Lartë, tani ngërçi kalon në gjykatat e Apelit.

Piramida e Gjykatave Shqiptare pritet të shkatërrohet deri në themelet e saj. Ka vetëm shkarkime dhe largime nga vettingu, nuk ka asnjë emërim pasi nuk po krijohen institucionet e reja të drejtësisë, të cilat mund të bëjnë emërimet e gjyqtarëve dhe prokurorëve.

Korça jep shembullin e para, shembullin sesi refoma në drejtësi përtej asaj që presin qytetarët, po sjell një ngërç të madh dhe një lëmsh në vonesat e çështjeve dhe gjyqet.

Tani në Korçë do të jetë vështirë për të shqyrtuar çështjet në themel, sepse në rast se do të kalohet me të gjithë masat e sigurisë, gjyqtarët do ta kenë të pamundur. Ardhja e të tjerëve duket të jetë një mision tepër i vështirë, kjo për shkak të reformës që kalon ditë pas dite dhe Korça do të jetë e para në Shqipëri që do të ngelet pa gjykatë Apeli./CNA.al