AKU/ Maja e Piramidës së helmit nga ushqimi ?

5 Shtator 2018, 08:46, Aktualitet CNA

Pavarësisht përpjekjeve mediatike për të retushuar sadopak “punën e palodhur” të institucioneve në shërbim të popullit, ato postime fotosh dhe rastesh sporadike nuk e ulin aspak përgjegjësinë që ky institucion ka nga ligji dhe nga taksapaguesit shqiptarë për t’i mbrojtur nga e keqja e hidhur e përditshme.

Ky retush nuk justifikohet aspak si në veprimet e çala dhe periferike që bën. Ajo çka është edhe më e rëndë është në meselenë e vetë institucionit AKU dhe ministrisë që e mbulon me papërgjegjshmërinë e saj karakteristike, është shkalla e lartë e mosveprimit në fakt.

Patjetër që ka nevojë të shkohet edhe në Dibër, edhe në Burrel, edhe në fshatrat turistike në Sarandë.

Por këto mediatizime janë asgjë më shumë se sa një fasadë e turpshme kur vetë ne si qytetarë, në mes të urbanizimit dhe duke “shijuar” më hir e me pahir rilindjen urbane, nuk shohim asnjë përpjekje të qenësishme të AKU anembanë e në çdo cep të qyteteve tona, ju jemi të detyruar të hamë, të pimë plehra dhe helme pranë helme e.

Është përgjegjësi direkte dhe indirekte e AKU mbushja e spitaleve me diagnostikime në rritje të profilit onkologjik, dhe jo vetëm nga ndotja ku drejtohet me hile dhe djallëzi gishti, por kryesisht dhe sidomos tek ajo çka popullata është e detyruar të blejë e të ushqehet me të.

Uji i ndotur, buka e ndotur, mishi i kalbur, sallami jashtë standardit, zarzavatet e helmatisura, biskotat e pakontrolluara, makaronat, gjalpi, qumështi, kosi, etj etj e pafund të tjera.

E gjithë shporta bazike e konsumit të përditshëm na rezulton e helmatisur në rastin më të keq, e në rastin më të mirë, e skaduar ose jashtë standardit.

Një nga paradokset e AKU : a e kontrollon ky institucion cesine dhe parametrat e ujit të pijshëm me të cilin shuajnë etjen banorët e Tiranës dhe të gjithë Shqipërisë? Nëse po, cilat janë rezultatet dhe rekomandimet?

Një tjetër skandal: pse AKU sillet si struci duke fshehur kokën në rërë dhe bën kontrolle fiktive aty ku nuk duhet, dhe bën sy qorr anembanë qyteteve?

Është e njëjta hipokrizi (ose një ose një prej tyre) sikur tatimet të kontrollonin dyqanet e Vilmës për cigare pa pullë akcizë, që s’ka shanse të ndodhë kurrë, dhe të anashkalojë (siç edhe e bën në fakt) lumin e cigareve të derdhura, pa pullë apo me pulla të huaja!

A me të vërtetë ky institucion kaq i rëndësishëm dhe vital për cilësinë e jetës së popullatës duhej me patjetër të drejtohej nga dikush ish-polic? A u mbaruan specialistët dhe profesionistët e fushës? Akoma do të vazhdohet me emërime ultra-politike dhe aspak profesioniste?

Nuk katastrofën ju është katandisur sot puna e AKU, pa asnjë justifikim për punën e drejtuesve paraardhës, të cilëve nuk U ka hyrë gjëmb në këmbë, ka vetëm një zgjidhje: ose të japë dorëheqjen, ose të fillojë të punojë siç duhet pa makijazh dhe pa dekoracione hipokrite propagandistike./ CNA.al