Shajnë dhe fyejnë/ Tre deputete kanë lënë nam në Kuvend

24 Gusht 2018, 18:48, Aktualitet CNA

Shahen dhe fyhen në publik dhe sërish vijojnë sikur të mos ketë ndodhur asgjë. Janë këta deputetetët e Kuvendit të Shqipërisë.

Në mesin e deputetëve që në vend të argumenteve, sharjet dhe fyerjet rezultojnë edhe tre gra, sipas raportit të publikuar nga Instituti i Studimeve Politike.

Monika Kryemadhi, kryetarja e LSI ?së, deputetet socialiste Ermonela Felaj dhe Elisa Spiropali , janë tre gratë politikane, që kanë dhënë shembullin më të keq në Kuvend, duke përdorur gjuhë denigruese, fyese dhe sharëse.

Rezultatet e monitorimit nuk ofruan surpriza për njohësit e ligjërimit politik, por përbëjnë surprizë për ata që zgjidhet i shohin gjithnjë nga lart, nga elita drejtuese politike.

Konkretisht, siç është parashtruar edhe në tabelë, janë konstatuar rastet më flagrante të retorikës së ashpër fyese dhe denigruese në parlament.

Me të njëjtat kuota (7 raste), sa i përket gjuhës denigruese dhe fyese janë edhe katër politikanët kryesorë në parlament, – kryeministri Edi Rama, ish- kryeministri Sali Berisha, kreu i grupit të mazhorancës Taulant Balla dhe kreu i opozitës Lulzim Basha.

Në diferencë me ta por gjithsesi në pjesën kryesore të listës negative ndodhen edhe disa deputetë të tjerë të njohur, përfshirë kryetaren e LSI. Në tetë emrat më me shumë raste të tilla të identifikuara, katër janë të PS, tre të PD dhe një i LSI, nga të cilat, katër janë politikanë meshkuj dhe tri gra politikane.

Gjuha jo etike e komunikimit ka prekur një numër të madh deputetësh të tjerë që vijojnë listën me dy ose një rast flagrant.

Janë së paku 88 fjalime të tilla dhe 45 deputetë, midis të cilëve bëjnë pjesë edhe emrat kryesues në renditjen e deputetëve me treguesit më të lartë të efikasitetit në sesionin e fundit parlamentar.

Për shkak se ky tregues negativ nuk është përdorur si kriter vlerësimi për deputetët, përfshirja e tyre në listën e mëposhtme nuk është reflektuar as në renditjen përfundimtare.

Interesant është gjithashtu fakti se në të këtë sesion, në ligjërimin fyes dhe gjuhën degraduese në parlament u përfshinë edhe deputetë të njohur për formimin akademik apo intelektualë, ish ministra apo ministra të njohur për moderacionin në karrierën politike. Pavarësisht se Kodi i Etikës parasheh masa penalizuese në raste të tilla, asnjë prej tyre nuk është penalizuar për këtë./CNA.al