Fiktivë apo mashtrues?/ Zbardhen emrat e deputetëve që paguhen pa punuar

23 Gusht 2018, 16:14, Aktualitet CNA

Rregullorja e Kuvendit është e qartë në përcaktimet lidhur me pjesëmarrjen e deputetëve në Komisione, dokumentimin e pjesëmarrjes, procesverbalet dhe pagesat financiare që bëhen për shkak të pjesëmarrjes.

Në praktikë, ashtu si edhe në të kaluarën, edhe gjatë këtij sesioni parlamentar janë konstatuar raste të shumta të dokumentacionit fiktiv në lidhje me prezencën e deputetëve në mbledhjet e Komisioneve.

Monitoruesit e ISP kanë evidentuar mbi 50 raste të fiktivitetit në pjesëmarrje, si dhe raste të shumta kur deputetët vijnë në komision 2-3 minuta për të shënuar emrin dhe më pas largohen.

Fiktiviteti nuk është vetëm shkelje administrative dhe etike, por ka të bëjë edhe me pasoja në trajtimin financiar, si dhe shpesh edhe me legjitimitetin e vendimeve.

Gjatë sesionit u konstatuan raste të shumta kur numri i pjesëmarrësve në mbledhje ishte +1, pra shumica e thjeshtë e anëtarëve të Komisionit, siguruar kjo përmes sjelljes së ndonjë deputeti zëvendësues nga jashtë apo nga praktika abuzive, ku i njëjti deputet regjistrohet njëherësh në më shumë se një komision, për të krijuar shumicën legjitime të mbledhjes.

Deputetët ?mashtrues?

Grupi monitorues i ISP ka konstatuar se në mbledhjen e Komisionit të Ligjeve: Më 18 janar janë regjistruar si pjesëmarrës dy deputetë Gent Strazimiri dhe Fatmir Mediu, të cilët në fakt nuk kanë qenë të pranishëm.

Më 30 janar janë shënuar dy deputetë Enkelejd Alibeaj dhe Arben Pëllumbi, të cilët nuk kanë qenë të pranishëm.

Më 12 shkurt figurojnë deputetët Jurgis Çyrbja, Nasip Naço dhe Oerd Bylykbashi, të cilët realisht nuk kanë qenë të pranishëm

Më 19 shkurt figuron pjesëmarrëse deputetja Dhurata Çupi ndërkohë që ajo nuk ka qenë e pranishme.

Më 27 shkurt deputetja Klotilda Bushka figuron prezent, kur në fakt nuk ka qenë e pranishme në mbledhje. Më 28 shkurt figurojnë prezentë deputetët Gent Strazimiri, Oerd Bylykbashi e Edmond Leka, kur në fakt ata nuk kanë qenë të pranishëm në mbledhje.

Më 27 mars në procesverbal rezultojnë si prezent edhe deputetët Tom Doshi, Caka dhe Mediu, të cilët në fakt nuk kanë qenë në mbledhje.

Më 3 prill rezultojnë prezent Blendi Çuçi e Silva Caka, të cilët në fakt nuk morën pjesë në mbledhje. Më 14 maj figurojnë pjesëmarrës Silva Caka e Vasilika Hysi, të cilët realisht nuk kanë qenë në mbledhje.

Më 22 maj mungojnë deputetët Fatmir Mediu, Oerd Bylykbashi dhe Dhurata Çupi edhe pse zyrtarisht figurojnë pjesëmarrës. Më 28 maj figurojnë pjesëmarrës deputetët Blendi Çuçi dhe Jurgis Çyrbja, të cilët faktikisht nuk ishin në mbledhje. Më 29 maj figurojnë prezent deputetët Jurgis Çyrbja dhe Astrit Veliaj, të cilët faktikisht nuk ishin pjesëmarrës.

Më 11 qershor figurojnë pjesëmarrës deputetët Silva Caka dhe Spartak Braho, të cilët faktikisht nuk ishin prezent në mbledhje. Më 2 korrik në procesverbal rezultojnë prezent deputetët Spartak Braho, Tom Doshi, Dhurata Çupi, të cilët nuk kanë qenë realisht në mbledhje. Më 3 korrik figurojnë zyrtarisht pjesëmarrës deputetët Spartak Braho dhe Fatmir Mediu, të cilët realisht nuk kanë qenë prezent në mbledhje.

Më 10 korrik figurojnë pjesëmarrës deputetët Nasip Naço e Silva Caka, të cilët faktikisht nuk kanë qenë prezent në mbledhje etj.

Flagrante është rasti i mbledhjes së Komisionit të Ligjeve më 20 mars.

Deputeti Edmond Leka mungon në mbledhje, por zyrtarisht edhe në procesverbal ai figuron pjesëmarrës, ndërkohë që po në këtë mbledhje u shty një nga pikat e rendit të ditës pikërisht sepse mungonte pikërisht relatori i projektligjit, deputeti Leka.

Po ashtu në atë mbledhje munguan edhe deputetët Silva Caka, Nasip Naço, të cilët figurojnë pjesëmarrës në procesverbalin e mbledhjes./CNA.al