Ngërçi në KLGJ e KLP/ Dhjetra prokurorë dhe gjyqtarë i tremben reformës në drejtësi

4 Gusht 2018, 08:28, Aktualitet CNA

Reforma në drejtësi nisi që në fund të 2015 dhe tani pas gati 3 vitesh, ende nuk po hyn në shinat e duhura. Teksa të gjithë po prisnin që shtatori të sillte luftën antikorrupsion, KLGJ dhe KLP janë shtyrë. Në KLGJ mungojnë gjykatësit nga apelet e rretheve ndërsa në prokurori nuk ka prokurorë nga apelet në Tiranë dhe pa ta nuk mund të ngrihen këto organe.

Po ku qëndron problemi? Pse u shkua sërish në ngërçe?

E gjithë çështja qëndron te aftësitë dhe përvoja e gjyqtarëve dhe prokurorëve në vend, por dhe te frika nga reforma. Një vit më parë u përzgjodhën kandidatë për KLGJ e KLP dhe që në atë kohë u paralajmërua diçka e tillë. Kandidatët nga Gjykatat e Apeleve për KLGJ ishin: Ilir Toska, Gjykata e Apelit Tiranë; Nertina Kosova, Gjykata e Apelit për Krime të Rënda dhe Besim Trezhnjeva, Gjykata e Apelit Durrës.

Pra ishin 3 kandidatë për 2 vende vakante dhe nga këto vetëm një nga rrethet. Problemi duket se qëndron te Gjykata e Lartë e cila hapi garën, pasi nëse ajo do e kishte bërë thirrjen dhe do kishte zgjatur procedurat, mund të kishte dhe kandidatë të tjerë. Sa i takon situatës në KLP, përfaqësues nga Apelet ishin: Luan Kaloçi, Prokuror në Prokurorinë pranë Gjykatës së Apelit Tiranë; Bujar Hoti, Prokuror në Prokurorinë pranë Gjykatës së Apelit Durrës; Arben Dollapaj, Prokuror në Prokurorinë pranë Gjykatës së Apelit Shkodër dhe Besa Nikëhasani, Prokuror në Prokurorinë pranë Gjykatës së Apelit Shkodër.

Nga këta emra bie në sy se ka vetëm një emër nga Apeli Tiranë. Nëse Adriatik Llalla në atë kohë do kishte marrë parasysh se vetingu mund të eliminonte një nga ta, gara mund të shtyhej dhe të bëhej thirrje për përfaqësues të tjerë. Një shembull të tillë ndoqi Kuvendi në atë kohë, për përfaqësuesit nga shoqëria civile, pasi e hapi disa herë garën derisa u sigurua një numër i mjaftueshëm emrash. Por ka dhe një problem tjetër, raporton sot.com.

Shumë emra nuk plotësojnë kushtet, pasi duhet të jenë vlerësuar ?shumë mirë? nga KLD dhe të kenë mbi 10 vite përvojë. Nga ana tjetër, shumica i tremben reformës. Anëtarët e KLGJ e KLP do jenë në vëzhgim dhe përgjim, prandaj si duket refuzojnë kandidaturat.