Fakte-Vrasje horror dhe shpërthime me eksploziv/ Fatmir Xhafaj mundet nga krimi

3 Gusht 2018, 10:50, Aktualitet CNA

Situata kriminale në Shqipëri është jashtë kontrollit.

Krimet të Rënda kanë pushtuar cep më cep vendin, por sipas Ministrit të Brendshëm Fatmir Xhafaj, situata është normale.

Rreth dy javë pas krimit makabër që tronditi Shkodrën dhe mbarë, Shqipërinë me ekzekutimin e ish-policit dhe bashkëjetuesen e tij, Ministri Xhafaj ka ndaluar në qytetin verior.

Ministri i brendshëm Fatmir Xhafaj ka qenë sot në Shkodër, ku ka zhvilluar një takim me strukturat e Policisë Vendore në Shkodër.

Ai ka përgëzuar policinë për punën që kanë bërë dhe nuk kishte se di të ndodhte ndryshe, se nuk do të pranojë dështimet e tij.

?Vlerësim pozitiv për punën e strukturave të Policisë Shkodër. Ju inkurajoj për gjithçka po bëni, me gjithë vështirësitë që keni në punën e përditshme. Keni një vlerësim të veçantë për reagimin policor në parandalimin e disa ngjarjeve të fundit në Shkodër, të cilat kanë rritur klimën e besimit të qytetarëve te Policia e Shtetit?, është shprehur ministri Xhafaj.

Sado që ministri Xhafaj kërkon të hedhë mjegull mbi kriminalitetin në vend, faktet flasin ndryshe dhe rrëzojnë qëndrimin e tij.

Fillimisht po sjellim fakte që vijnë nga Isntituti i Statistikave që japin alarmin për rritjen e kriminalitetit në vend.

Nga të dhënat zyrtare të Institutit të Statistikave rezulton se në tremujorin e parë, të vitit 2018, janë shënuar në total 7.909 vepra penale dhe krahasuar me të njëjtën periudhë të vitit të shkuar, pra ka rritje me 5.5%.

Po problem më i madh rezultojnë vrasjet me dashje, pasi janë rritur me 50% më shumë se në 2017.

Rritje ka pësuar dhe numri i veprave penale për vjedhje lokalesh, bankash apo dyqanesh.

Sipas INSTAT, në tremujorin e parë 2018, janë shënuar 182 raste, me rritje 24.7%, krahasuar me 2017. Kurse për veprën shkelje e rregullave të qarkullimit rrugor, në këtë tremujor janë evidentuar 453 autorë, rreth 62 autorë më shumë, krahasuar me të njëjtin tremujor të vitit 2017.

Këto fakte që vërtetojnë dështimin e Xhafajt kanë dalë nga një institucion shtetëror, por për ministrin e Brendshëm kjo situatë kriminiale përkthehet në normalitet.

Më poshtë po sjellim edhe disa nga ngjarjet më të rënda të ndodhur në një afat të shkurtër kohor.

Vrasja e çiftit në Shkodër, 6 korrik 2018

Boran Berçana dhe Silvi Ndocit u vranë në mënyrë macabre natën e 6 korrikut në Shkodër , ndërkohë rasti është ende i pazbardhur.

Vrasja e 34-vjeçarit nga Laçi

Kejsi Hysa u vra në 3 korrik për një borxh me fajde që ia kishte dhënë disa miqve të tij.

7 korrik 2018, terror me armë në Dhërmi

Natën e 7 korrikut, në Dhërmi të shtënat e armëve kanë tmerruar klientët në lokal. Persona të armatosur u konfliktuan me njëri-tjetrin dhe nxorrën armët duke qëlluar.

Korrik 2018, shpërthimet me eksploziv

Me datë 1 korrik në derën e shtëpisë së një polici në Bubq shpërtheu një sasi tritoli.

Me 20 korrik 2018 dyqanin e motrës së ish-gjyqtarit të Kushtetuees Drita Lulo, u shpërthye me eksploziv

Me 27 korrik 2018, në shtëpinë e Xhelal Dacit shpërtheu një sasi tritoli.

Krimi në Elbasan

Me datë 19 korrik 2018 në Elbasan një makinë u dogj qëllimisht. Mjeti ishte në pronësi të Lavdrim Çapjes. Nuk ka asnjë arrestim për këtë ngjarje./CNA.al