E fundit!

22:46 Aktualitet

Deklarata e Paunoviç/ Sveçla: Nuk është personale, reflekton qëndrim të Serbisë

Ministri i Brendshëm në Kosovë, Xhelal Sveçla ka folur mbr...

Disa banka në Shqipëri drejt shkrirjes/ Punonjësit e tyre në rrezik pas pushimit nga puna

30 Qershor 2018, 15:46, Aktualitet CNA

Pas mbylljes së konsultimeve pa rezultat pozitiv për të arritur një marrëveshje mes Intesa Sanpaolo Bank dhe Sindikatës së Punonjësve të Pushuar nga Puna në Veneto Banka, këta të fundit me anë të një kërkese zyrtare të paraqitur pranë Ministrisë së Financave dhe Ekonomisë, kërkojnë një takim me ministrin Arben Ahmetaj.

Mungesa e “Fondit të Solidaritetit” për punonjësit e pushuar nga puna në Veneto Banka nga ana e Intesa Sanpaolo Bank, mund të jetë vetëm “maja e ajsbergut”. Kjo sepse po të njëjtin fat i pret edhe punonjësit e Bankës Kombëtare Greke (NBG), madje edhe ata të Tirana Bank.

Sindikatat e punonjësve të këtyre tre bankave që do të përthithen nga banka të tjera, në këtë rast ABI Bank apo Intesa Sanpaolo Bank, duket se kanë gjetur një gjuhë të përbashkët ditët e fundit. Në këto ditë mjaft të vështira për fatin e rreth 600 punonjësve të pushuar nga puna nga ky proces bashkimi bankash.

“Punësimi dhe punonjësit e siguruar” që po shpalos me aq shumë pathos së fundmi Qeveria Shqiptare, duket se ka arritur në një pikë mjaft delikate, për rreth 600 punonjësit e parë të pushuar nga puna të sektorit bankar. Këta punonjës ndodhen sot në një kurth proceduarial, sepse Qeveria Shqiptare duket se nuk ka ndikuar aspak tek institucioni i Bankës së Shqipërisë, që kjo e fundit të krijojë një “Fond Solidariteti” nga ana e bankave, për ato banka që kërkojnë të shiten apo bashkohen.

Rasti i Bankës Credit Agricole që i rimbursoi punonjësit e saj shqiptarë, të cilët vazhduan të punojnë në ABI Bank, është një dëshmi e qartë e dy standarteve që ofrohen për punonjësit e bankave në Shqipëri, ku rreth 600 prej tyre do të rezultojnë të pushuar deri në fund të këtij vitit. Apo rasti tjetër në Italinë fqinje, ku punonjësit e Veneto Banka, të po të njëjtës bankë me kolegët shqiptarë, ndryshe nga ata italianët u dëmshpërblyen nga shteti italian.

Dhe kjo ndodhi pas operacionit të vështirë financiar të dy bankave të shtetëzuara që u përthithën nga Intesa Sanpaolo Bank e cila arkëtoi plot 35 miliardë euro nga Qeveria Italiane e ish-Kryeministrit Gentilioni për këtë operacion. Qeveria Italiane, një Qeveri e një vendi anëtar të Bashkimit Evropian, ndoqi rigorozisht udhëzimet e Bankës Qëndore Europiane, për të mos u larguar asnjë punonjës nga puna pa u dëmshpërblyer nga “Fondi i Solidaritetit”.

Po në Shqipëri, vendi që aspiron Bashkimin Evropian dhe standartet europiane, kush duhet ta krijonte këtë “Fond Solidariteti”, për të mos krijuar efekte sociale tek punonjësit e bankave të nivelit të II-të të pushuar nga puna? Banka e Shqipërisë apo Ministria e Financave dhe Ekonomisë duhet të mendonte për krijimin e këtij Fondi Solidariteti?

Këtë përgjigje do ta mësojmë shumë shpejt, kur të shohim së bashku 600 punonjësit e parë të pushuar nga puna, të Veneto Banka, Bankës Kombëtare të Greqisë (NBG) dhe të Tirana Bank. Të gjitha këto banka të huaja, greke dhe italiane që janë duke u përthithur nga banka më të mëdha që operojnë në Shqipëri.

Aty ku natyrisht roli i Bankës së Shqipërisë është “minor” për të mos thënë pothuajse i papërgatitur për t’u përballur me të tilla pasoja sociale për punonjësit e pushuar nga puna të këtyre bankave dhe të tjera banka në vitet e ardhshme. Kjo sepse ky institucion, pra Banka e Shqipërisë më shumë sheh anën proceduariale, dokumentacionin dhe aspak kapitalin njerëzor dhe human, punonjësit e këtyre bankave sepse ndoshta i intereson më shumë kapitali financiar.