Tre pistat e hetimit/ Çfarë fshihet pas vrasjes së shoferit të Xhafajt?

30 Qershor 2018, 14:49, Aktualitet CNA

Mëngjesin e sotëm, është regjistruar një ngjarje e rëndë, në kryeqytet.

Shoferi i ministrit të Brendshëm Fatmir Xhafaj është gjetur i vdekur brenda makinës së Ministrit, në garnizonin e Gardës së Republikës.

Disa orë pas ngjarjes, policia ka dalë me një njoftim zyrtar, ku e klasifikonte rastin si vetvrasje, edhe pse ende nuk janë kryer të gjitha procedurat e hetimore dhe mbi të gjitha nuk është kryer autopsia.

Gjithsesi përballë kësaj ngjarje të rëndë që prek Ministrin e Brdnshëm Fatmir Xhafaj, i cili e kishte njeri të besuar 31 vjeçarin, qarkullojnë tre pista.

Pista e parë, dhe që është hedhur tashmë nga Policia është vetëvrasje, për probleme personale që 31 vjeçari mund të ketë patur.

Por, kjo pistë lëkundet, për vetë faktin dhe vendin ku është gjetur viktima. Nëse do t?i jepte fund jetës për probleme të personale, përse zgjodhi makinën e Ministrit Xhafaj në garazhin e institucionit të Gardës? Vendi i punës, ishte vendi i parë ku do të kërkohej.

Pista e dytë është paralajmërim për punën e ?mirë? të Ministrit Xhafajt ndaj krimit.

Xhafaj çdo ditë i thur lavde vetes, para kryeministrit Edi Rama, se po lufton krimin e organizuar dhe korrupsionin, madje po e çrrënjos atë.

Ndoshta për t?i treguar Ministrit, se situatën e ka jashtë kontrollit, dhe të falat ia çojnë duke e goditur tek njeriu i tij i besuar. Kur krimi godet në folenë e Ministrit të Brendshëm, as mund të flitet më për nivel sigurie.

Pista e tretë, ka të bëjë me dyshimet se 31-vjeçari Qordja, mund të ketë qenë i përfshirë si garantor në ndonjë ngarkesë të madhe lënde narkotike apo parash, të cilat janë sekuestruar.

Gjithsesi, janë institucionet kompetente që pritet të thonë fjalën e fundit për këtë rast.

Sipas Policisë, nga kqyrja rezultoi se në kokën e viktimës ka plagë tejshpuese të shkaktuar nga armë zjarri, me qitje me drejtim nga e djathta në të majtë.

Në vendngjarje u gjetën 3 gëzhoja të qitura nga arma automatike tip ?MP5?, e cila ishte në dorën e djathtë të viktimës, me levën e ndërrimit të llojit të zjarrit, në pozicionin ?qitje breshëri?./CNA.al