Informaliteti në bregdet/ Reagon Konfederata e Sindikatave

19 Qershor 2018, 10:38, Aktualitet CNA

Sezoni turistik është mbreti i informalitetit. Të paktën kështu e bën me dije ‘Konfederata e Sindikatave të Shqipërisë? e cila nxjerr në pah problemet e tregut të punës, dhe informalitetin që iu bëhet punonjësve sezonalë.

Kushtet e vështira të punës, puna jashtë orarit, shfrytëzimi i të miturve dhe mospagimi i orëve shtesë janë disa nga çështjet që trajtohen në denoncimin e bërë nga kjo sindikatë.

Postimi i plotë:

Qeveria shqiptare këtë sezon veror ka premtuar se do ketë bum turistësh të huaj që do vizitojnë vendin tonë, ndërkohë nuk thuhet gjysmë fjale për problemet e tregut të punës gjatë kësaj periudhe, që janë jo të pakta.
Konfederata e Sindikatave të Shqipërisë me mijëra punonjës sezonale punësohen pranë bizneseve në zonat bregdetare në mënyrë informale.
Atyre nuk u paguhet as paga minimale prej 24 mijë lekësh, nuk ju paguhen as kontributet shoqërore, detyrohen të punojnë jashtë orarit për javë më radhe, teksa orët shtesë sërish nuk u paguhen.
Taksidarët e Tatimeve dhe Inspektorët e Inspektoriatit Shtetëror të Punës pasi marrin ?kafen? tek pronarët e bizneseve ku lulëzon informaliteti dhe skllavërimi nuk raportojnë problematikën, që i vë në njollë të zezë turizmit në vendin tonë.
Resorte luksoze që vlejnë miliona euro nga Velipoja në Ksamil, punësojnë persona që i paguajnë me 15 mijë lekë të reja në muaj.
Kjo është një panoramë e përsëritur ndër vite e nuk po gjen zgjidhje, teksa varfëria detyron punonjësit sezonalë të pranojnë kushtet e punës, që janë jashtë çdo norme ligjore dhe logjike ekonomike.
Nuk mund të pretendosh të konkurrosh në turizëm Kroacinë, Greqinë, apo Turqinë, sa kohë bizneset shqiptarë që operojnë në sektorin e shërbimeve i trajtojnë punëtorët e tyre me standartet e Lindjes Mesme e Afrikës Veriore.
Informaliteti në tregun e punës përgjatë 3 muajve të sezonit veror ka pasoja në buxhetin e shtetit, e Ministri i Financave ,Arben Ahmetaj, si duket është i angazhuar në procesin e shpikjes së taksave të reja për shqiptarët,ndaj nuk e gjen kohën të mbledhë Këshillin Kombëtar të Punës për të trajtuar këto problematika serioze me Konfederatën e Sindikatave të Shqipërisë dhe grupet e interesit.
Mosfunksionimi i Këshillit Kombëtar të Punës, i hap shteg abuzimeve të privatit karshi punonjësve dhe tregu i punës kthehet në një xhungël,ku dihet se kush përfiton më shumë.
Një tjetër fenomen është shfrytëzimi i fëmijëve të mitur, ku nga shifrat (jo zyrtare) që posedon Konfederata e Sindikatave të Shqipërisë janë mbi 6 mijë fëmijë nën 16 vjeç që punësohen në sektorin e shërbimeve ose vetëpunësohen përgjatë sezonit veror.