Pastrimi i parave dhe evazioni fiskal/ A do të hetohet Çili dhe UET?

14 Qershor 2018, 09:31, Aktualitet CNA

UET (Universiteti Europian i Tiranës) i reklamuar si një histori suksesi në arsim, në fakt është pjesërisht një histori suksesi në biznes, dhe shumë e reklamuar si një institucion arsimor.

Duke u larguar nga çdo lloj debati apo paragjykimi, UET sipas të dhënave zyrtare nga Ministria e Arsimit, sot është një universitet që ka regjistruar gjysmën apo më pak studentë se katër vite më parë dhe sipas të dhënave nga një bankë e nivelit të dytë, ka rreth 16 miliardë lekë të vjetra detyrime. Këtu nuk përfshihen huamarrjet apo borxhet ndaj të tretëve.

UET filloi si një histori biznesi, gati 12 vite më parë. Me një hyrje apartamenti dhe me pesë ortakë. Bashkëpunëtorët kryesorë të Henri Çilit, një e nga një u larguan. Universiteti regjistronte me mijëra e mijëra studentë. Aq shumë i reklamuar në media dhe shumë shpejt u kthye në mjaft i preferuar.

Nga një hyrje pallati, me shpejtësi u kthye në një universitet, që falte gati një miliard lekë bursa në vit. Këto për studentë nga partitë politike, apo dhurata të tjera të Henri Çilit dhe bashkëpunëtorëve të tij.

Nga një “kioskë universitare”, u kthye në një universitet i vërtetë, por që shpejt u kap me 101 probleme nga një kontroll i Ministrisë së Arsimit në vitin 2014.

Në atë kohë u mbyllen rreth 20 universitete private, me rreth 6500 studentë.

Në atë kohë u kontrollua edhe UET. Ministria e Arsimit gjeti vetëm amzat elektronike dhe studentë të pa matrikuluar. Për këto shkelje shumë universitete u mbyllen, ndërsa UET e kaloi me një këshillim.

Në atë kohë Henri Çili kishte “kapërcyer ylberin”. Nga njeriu që kërkonte mandatin e tretë për Sali Berishën, ishte kthyer në mbështetësin publik të Edi Ramës dhe më pas me shpatë në dorë, në mbrojtësin kryesorë të reformës në arsim.

Përtej të gjitha këtyre shpesh në media është raportuar për miliona euro që qarkullojnë, për borxhet në tatime në periudha të ndryshme, tani kredi dhe bilance të një biznesi VIP, që u fry dhe u zmadhua në rreth një dekadë. Për të gjitha këto dhe gjithçka nga ato që duken dhe ato që nuk duken, nga ato që dihen, por edhe shumë prej atyre që fshihen, në përfundim të këtyre 12 viteve të UET kemi disa dhjetëra miliona euro të qarkulluar. Media të raportuara si fondacione, miliona të tjera për reklama, bursa të falura, taksa të papaguara, miliona të shpëtuara me amnisti fiskale, dhe për të gjitha këto, institucionet kanë mbyllur sytë.

Prokuroria nuk ka hetuar asnjë herë. Krimi ekonomik ka bërë sikur nuk ka parë. Pa folur për mundësinë e një evazioni të thellë fiskal, apo pastrimit të parave. Dhe kjo e fundit për t’u vërtetuar duhet të hetohet.

Por, UET dhe Naim Çili (Henri Çili), nuk janë hetuar as nga pastrimi i parave dhe as nga krimi ekonomik, për të hapur një herë e mirë bilancet dhe për të lexuar të vërteten e frikshme që mund të gjendet në to./ CNA.al