E fundit!

19:46 Politikë

“Këshilli Kombëtar, kozmetikë e Berishës”/ Spaho: PD do e ketë të pamundur të jetë rivale e PS

Ish-nënkryetari dhe ish-deputeti i PD-së Edmond Spaho ka k...

Shënim/ Droga që mbulon qeverinë

1 Mars 2018, 11:25, Aktualitet CNA

Dje në Durrës u kap një sasi prej 613 kg kokainë e pastër, e cila ka një përllogaritje në vlerë rreth 180 milion euro. Aq e madhe është vlera sa tashmë duhet të ndryshojmë edhe emrin e Eskobarit të Ballkanit apo Europës, por kjo ka pak rëndësi.

Drogë, drogë, drogë, drogë dhe vetëm drogë raportojnë çdo ditë mediat. Sot, raportonin dje dhe më parë. Shqipëria ka pasur një ishull kanabisi dhe disa sasi droge që kapeshin. Origjina e tyre quhej Lazarat. Tashmë nuk kemi më sasi me kilogram, por me kuintalë dhe tonelata.

Droga mbuloi Shqipërinë, mbuloi dhe qeverinë e kryeministrit Rama që e mohoi. Ishte kanabis që u mboll nga jugu në veri. Sasitë vazhdojnë të shpërndahen, të dalin nga tunelet apo rezervat ku janë fshehur.

Përballë kanabisit anë e kënd Shqipërisë, prej disa vitesh është kokaina, një drogë e niveleve të larta dhe mjaft e shtrenjtë që vit pas viti është më prezente në Shqipëri, e cila është kthyer në një nyje trafiku të kokainës dhe heroinës.

Revista gjermane STERN, në një artikull me teme ?”Gjurma e re e droges”, tregonte rrugën e re të kokainës disa javë më parë, nga Shqipëria drejt Gjermanisë. Droga e kapur dje në Durrës, u theksua se do të shkonte drejt perëndimit, drejt Gjermanisë.

Pak kohë më parë u kap një tjetër formë droge, nëpërmjet vajit të palmës. Ndërkohë në Xibrakë të Elbasanit u zbulua një laborator kokaine, këtu përmendim tre apo katër raste që kanë pasur sasira të mëdha dhe për zbulimin e tyre kanë ndërhyrë shërbimet e huaja sekrete. Javën e parë u tha Gjermania, tani bashkëpunimi me Italinë, etj.

Të gjitha faktet që përmendim i përkasin kronikës në këto katër apo pesë vitet e fundit. Histori me kanabizim dhe trafik hashashi. Histori me drogëra të forta dhe laboratore kokaine apo sasi me vlera qindra milion euro të kapur.

Një pjesë kapen, një pjesë shkon drejt Europës, agjencitë e huaja të shqetësuara për Shquipërinë.

Rasti i djeshëm i Durrësit dhe raste të tjerë janë për tu përshëndetur, askush të mos ketë asnjë ngurim që meritat t’ja japë Policisë së Shtetit. Le të marrë merita edhe Edi Rama, por sado të shumta të jenë ato, nuk e shplajnë dot qeverinë nga droga.

Droga në Shqipëri, kanabizimi, tani dhe kokaina janë lumë. Edi Rama nuk mund ta shplajë trubullirën e tij me disa pika uji siç janë rastet e kapura të kanabisit apo drogërave të forta.

Qeveria është e mbuluar me drogë. Historia e saj nuk fillon pesë vite më parë, por në pesë vite ka pasur një zhvillim të paparë. Këtë e thonë mediat e huaja, këtë e thonë agjencitë e huaja, këtë e pranon dhe vetë qeveria, e cila rritjen e trafiqeve dhe mbjelljes së drogës kërkon ta mbulojë me disa fitore, të cilat nuk e bëjnë të shkëlqejë qeverinë, përveçse nxin më tej historinë që tregon se Shqipëria u mbulua me drogë dhe vazhdon të jetë një nga nyjet kryesore të trafikut dhe shqetësim për mbarë Europën dhe këtë meritë nuk e ka askush tjetër veç qeverisë shqiptare, që është e mbuluar me drogë./ CNA.al