Propaganda komuniste dhe realiteti i “shqiponjave” shqiptare të ajrit

20 Dhjetor 2017, 10:26, Aktualitet CNA

Duke analizuar 5 fotot, që po publikojmë duam të trajtojmë një aspekt të propagandës së rrejshme komuniste, për sa i përket forcave të armatosura shqiptare, që do mundnin një koalicion armiqsh si psh. NATO-n dhe Traktatin e Varshavës së bashku! Normalisht tani, që nuk kemi ushtri fare, nostalgjikët komunistë mund të mburren me ushtrinë e kohës së Dullës, Komandantit legjendar, por?.

Fotoja e parë e publikuar në disa media e një album të kohës së diktaturës paraqet tre pilotë shqiptarë në vitin 1981 pra vetëm 3 vjet pas prishjes me Kinën. Pilotët janë të veshur me uniformën e liridaljes në gjendje të mirë e mjaft dinjitoze, ndërsa në sfond janë rrjeshtuar nja 20 kopje kineze të avionëve gjuajtës MIG 19 sovjetikë, të quajtur Shenyang J-6. Për vitin 1981 MIG 19 ishte relativisht i vjetëruar,por gjithsesi një kundërshtar i rreptë e superior për gjithfarë Galeb-ësh, e Super Jastreb-ësh jugosllavë si dhe kundërshtar ende efikas ndaj Mirage III Cs dhe F-4D të forcës ajrore ushtarake helenike. Faktikisht, ndonëse furnizimi i fundit nga Kina për aviacionin shqiptar ishte i vitit 1977 pra vetëm 4 vjet më parë, problemet logjistike dhe ato, që shoqërojnë vjetërimin e teknikës luftarake kishin filluar të shndërroheshin në gangrenë për ?shqiponjat? shqiptare të ajrit!

Fotoja e dytë po e vitit 1981, nuk u bë kurrë publike, sepse ia nxirrte kallajin disi propagandës zyrtare. Në të janë fotografuar 6 avionë gjuajtës kopje tkineze tip Shenyang F-5 të avionëve sovjetikë MIG 17 po në aneksin ushtarak të Aeroportit të Rinasit. MIG 17 (kopjet kineze) në vitin 1981 ishin plotësisht obsolet (të vjetëruar). Në foto bie në sy, që aviacioni luftarak shqiptar ka probleme të mprehta logjistike. MIG-ët po tërhiqen në pistë për tu futur në hangarët e fortifikuar nga kamionë të lehtë prodhim kinez Yuejin kopje të kamionëve sovjetikë GAZ 63. Këto kamionë prodhim i vitit 1970 janë vetëm 11 vjecarë, pra jo fort të vjetër, ndonëse kopje kineze të një patente sovjetike (kopje e përmirsuar e kamionit amerikan Ford) e vitit 1947 d.m.th. GAZ 51/GAZ 63. Dalohet qartë që kamioni i parë në foto tërhiqet nga një traktor bujqësor me goma prodhim cekosllavak tip Zetor 3011, patentë e vitit 1960 ardhur në Shqipëri në vitin 1964, pra 18 vjecar. Traktori origjinal është tip kabriole, por është modifikuar nga novatorët tanë duarartë me një kabinë prodhuar në mënyrë artizanale me fletë llamarine të Metalurgjikut jugosllav të Zenicës. Normal një foto e tillë me traktor bujqësor të vjetëruar e të modifikuar, që tërheq avionë obsolet (të vjetëruar) nuk mund t?i shërbente propagandës komuniste.

Fotoja e tretë dhe e katërt janë po të vitit 1981 në aneksin ushtarak të Aeroportit të Rinasit. Në to teknikët ushtarakë po i bëjnë shërbim profilaksie dy seksioneve të ndryshme të gjuajtësve MIG 19 (faktikisht kopje kineze të tyre tip Shenyang J-6). Për të kuptuar se në c?kushte primitive po punojnë teknikët e aviacionit luftarak shqiptar në vitin 1981 duhet të konsultojmë fotot e vitit 1941 në Fushën e aviacionit (air strip) të Kucovës në kushte lufte, sepse jemi në kulmin e Luftës Italo-greke.

Fotoja e pestë teknikët italianë po i bëjnë shërbim profilaktik një avioni gjuajtës FIAT G 50, i mbiquajtur ?Freccia? (Shigjeta) në mars 1941. Ndryshimi i vetëm është, që në Tiranën e vitit 1981, në kushte paqeje kemi pistë aviacioni prej betoni, ndërsa në Kucovën e 40 viteve më parë, në kushte lufte pista është me bar. Madje mund të themi se kominoshet e punës të teknikëve italianë të aviacionit duken si më praktike se kominoshet kineze veshur 40 vjet më vonë nga teknikët e aviacionit shqiptar. Shpresojmë, që shkrimi ynë mbështetur në 5 foto e plot terminologji teknike të aviacionit luftarak të jetë i kuptueshëm edhe nga lexuesi i gjerë shqiptar. Fundi i fundit jo më kot ka dalë edhe shprehja: një foto, që flet sa për 1 000 fjalë! /GJERGJ THANASI