Zgjedhja e Kryeprokurorit/ Dylgjeri tregon se ç'ndodh në Komisionet Kuvendore

13 Dhjetor 2017, 17:50, Aktualitet CNA

Gazetari Ylli Dylgjeri, ka reaguar në lidhje me dëgjesën me kandidatët për Kryeprokuror të Përkohshëm, që po zhvillohet në komisionin e ligjeve. Sipas Dylgjerit, ajo nuk është asgjë tjetër pos një shfaqje politike, pasi fituesi do të vendoset nga politika e lartë dhe jo nga Merita, e për këtë ai jep shembullin e tij, kur kandidonte për të qenë anëtar i Këshillit Drejtues të Radio-Televizionit Publik Shqiptar.

Ai tregon me anë të një postimi në rrjetet sociale, sesi një herë ishte përzgjedhur, por 10 minuta para se lista të shkonte në Kuvend, emri i tij u hoq dhe u zëvendësua me një tjetër, që kishte mik në atë që Dylgjeri e quan si “politika e lartë”.

Ky është postimi i plotë i Dylgjerit:

“Pse nuk i besoj Komisionit Kuvendor?

Kam konkuruar dhe une 2 vite te shkuara per një detyrë publike. Bëhej fjale për vendin e Anëtarit në Këshillin Drejtues të RadioTelevizionit Publik Shqiptar.
Per mos e zgjatur, plotësova dokumentacionin sipas kërkesave ligjore dhe prita ditën kur do të ftohesha në Komision për Edukimin dhe Mjetet e Informimit Publik, per te mbrojtur platformën time. Me sa kujtoj ishim në gare mbi 70 kandidatë. Të gjithë pjesmaresit vinin nga fushat e Mediave dhe institucioneve të Kulturës …
Së fundi dita e dëgjesës erdhi. Rregullorja e Komisionit kërkonte të ligjëroja me shkrim e
me gojë. Ashtu u bë. Pasi leximit të projektit tim kalova dhe në dialogun pyetje-përgjigje me deputetët. Nga 5 minuta qe ishte rregulli u mbajta në panel 25 min.
Në fund, fytyrat e qeshura të deputeteve me dhane sinjalin se kisha marre vleresimet maksimale në baterine ku konkurova.
Më tej… Pritej sipas procedures perzgjedhja e 10 antareve që do votoheshin në seance plenare.
Ditën që u vendos të futej numri i antarëve të Këshillit në votim më njoftojnë se isha dhe unë i përzgjedhur…Një drejtues i lartë i RTSH-se më telefonoi dhe më uroi për detyrën.
Por…Jo!
Në 10 minutshin e fundit të mbylljes së listës Politika e lartë kishte ndërhyrë.
U hoq emri im. U zëvëndësova me një 70 vjeçar dhe u votua Ai në Kuvend. Këshilli i RTSH-së kaloi. Miku fitoi. Politika Triumfoi. Unë humba.
Rroftë Udhëheqja e Partisë…!” /CityNews