Meta mesazh Papa Françeskut: Vëmendja juaj na mbush me shpresë...

11 Dhjetor 2017, 15:46, Aktualitet CNA

Pas letrës së Papa Françeskut pas përmbytjeve që pushtuan vendin, Presidenti i Republikës, Ilir Meta i ka dërguar një mesazh falënderimi kreut të Vatikanit.

Me anë të një letre, Meta shprehet, “Shenjtëria Juaj,

Kam nderin e veçantë që në emër të popullit shqiptar t?Ju shpreh mirënjohjen time të thellë për mesazhin Tuaj gjatë Meshës së Shenjtë të ditës së djelë dhe fjalët Tuaja mbështetëse, solidarizuese e inkurajuese për popullin shqiptar dhe vendin tim të goditur së fundi nga moti i keq dhe përmbytjet e shkaktuara prej tij.”

Në vijim Presidenti Meta shprehet se lutjet e Papa Françeskut dhe vëmendja e tij ndaj Shqipërisë, e mbushin popullin shqiptar me shpresë, ndërsa shton se të gjithë së bashku duhet të kujdesen më shumë për planetin Tokë.

“Lutjet Tuaja Shenjtëri dhe vëmendja e kujdesi që Ju dhe Selia e Shenjtë vazhdoni të tregoni ndaj Shqipërisë, mua dhe popullin tim, na mbushin me shpresë e besim dhe forcë e kurajë për të përballuar dëmet e shkaktuara nga përmbytjet e fundit dhe për të qëndruar më afër me njëri-tjetrin dhe familjeve, prindërve dhe fëmijëve të prekur nga pasojat e përmbytjeve.

Ndaj me Ju, Ati i Shenjtë, mendimin se, të gjithë së bashku duhet të ndajmë më shumë përgjegjësi, të tregojmë vetëdije më të qartë e të kujdesemi me më shumë përkushtim ndaj Planetin Tonë të dashur, për të përballuar dhe luftuar fenomenin shqetësues të ndryshimeve klimatike, duke marrë vendime kurajoze të cilat, në të njëjtën kohë, do të luftojnë edhe varfërinë dhe do të ndihmojnë njeriun dhe shoqërinë njerëzore të zhvillohet dhe të begatojë më tej.”, – shkruan Meta.

Në përmbyllje të letrës së tij, teksa i uron shëndet Papa Françeskut, Meta shkruan: “Më lejoni t? Ju siguroj sërish Ati i Shenjtë se ne jemi shumë të lumtur që ngjarje të rëndësishme historike dhe shpirtërore botërore qendrojnë në themelet e shëndosha të marrëdhënieve të veçanta institucionale mes Shqipërisë dhe Selisë së Shenjtë.

Duke ju uruar jetë të gjatë dhe shëndet, ju lutem, pranoni Shenjtëria Juaj, shprehjen e konsideratës sime më të lartë!” /CityNews