E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Përfshirja e policisë në trafikun e drogës/ Haki Çako drejt largimit

25 Nëntor 2017, 15:54, Aktualitet CNA

Drejtori i përgjithshëm i Policisë së Shtetit, Haki Çako, ka përgatitur prej disa kohësh dorëheqjen e tij.

Burime i thanë CityNews.al që numri një i Policisë së Shtetit, i ka paraqitur dorëheqjen kryeministrit Edi Rama, por ky ende se ka pranuar. Pas skandaleve të njëpasnjëshme që kanë ndodhur në Policinë e Shtetit, si largimet e të gjithë drejtorëve të qarqeve, policë të shpallur në kërkim dhe eksponentë të rëndësishëm të policisë të përfshirë në trafikun ndërkombëtarë të drogës, drejtori i përgjithshëm i Policisë së Shtetit ka pasur dorëheqjen e gatshme mbi tavolinë, por ajo i është refuzuar nga kryeministri Edi Rama.

Mos pranimi i dorëheqjes, mos pranimi për zëvendësimin e tij ka të bëjë me faktin se Rama kërkon që të merren sa më pak përgjegjësi përsipër nga Policia e Shtetit. Qeveria kërkon të shmangë përgjegjësitë e saj për trafikun ndërkombëtar të lëndëve narkotike, megjithëse raportet e shteteve si Gjermania , Italia, SHBA dhe jo vetëm tregojnë përfshirje të madhe të strukturave të Policisë së Shtetit trafikimin e drogës.

Çako e drejton Policinë e Shtetit prej më shumë se dy vitesh. Ai ka qenë në krye të Drejtorisë së Përgjithshme të Policisë kur Shqipëria u mbulua me drogë. Të gjithë drejtorët e policive në qarqe kanë ikur, ndërsa Çako është në detyrë edhe pse i zëvendësoi ata.

Të njëjtat burime saktësuan, se Haki Çako është në dijeni të raporteve ndërkombëtare, jo vetëm të SHISH-it, por edhe të eksponentëve të policisë së trafikut dhe drogës, shumë prej tyre të emëruar edhe vetë prej tij.

Ky është rasti, kur Drejtori i Përgjithshëm i Policisë i ka shumicën e drejtorëve të qarqeve, shumicën e shefave të komisariateve dhe oficerët e lartë të policisë të përfshirë në trafik droge dhe vetë nuk ka marrë përsipër asnjë përgjegjësi, megjithëse, burimet thanë se ai ka dhënë dorëheqjen, por kjo nuk është pranuar nga Edi Rama.

Të njëjtat burime saktësojnë se kryeministri i vendit, largimin e Çakos e ka të përkohshëm, pasi pritet të zëvendësohet nga një emër, por kjo pritet të vendoset së shpejti nga kreu i qeverisë. Ky i fundit ashtu si në rastin e drejtorit të larguar Artan Didi pritet ti ofrojë një tjetër post.

Por tashmë duhet të shohim cili do jetë skenari i Ramës shkarkim apo pranim dorëheqjeje./ CityNews