Mësoni si do të veproj Prokuroria Speciale për të verifikuar vilat e politikanëve, prokurorëve dhe gjyqtarëve

28 Gusht 2017, 10:35, Aktualitet CNA

Eshtë i njejti model i përdorur në Kroaci, e që në mënyrë strikte nxorri në dritë të diellit mijëra dollarët që ish kryeministri kroat Ivo Sanader kishte përvetësuar në mënyrë të paligjshme. Ndërsa milionat e vëna nga ana e pushtetarëve, prokurorëve dhe gjyqtarëve shqiptarë janë lehtësisht të verifikueshme. Ndërkohë që Inspektorati i Lartë i Deklarimit dhe Verfikimit të Pasurive e ka bërë anën zyrtare të verifikimit të pasurisë së politikanëve dhe përfaqësuesve të sistemit të drejtësisë, tashmë situata ka mbërritur në terren.

Faza e parë e verifikimit në terren të pasurive të paluajtshme janë vilat e qeveritarëve dhe të punonjësve të sistemit të drejtësisë në resortet turistike. Vila që kushtojnë me miliona dollarë, shumë më tepër shpenzim se sa paga e një zyrtari të shtetit apo drejtësisë, qoftë ky dhe i nivelit më të lartë.

Burime të besuara saktësojnë se ka filluar verifikimi i vilave në gjirin e Lalzit, në Qerret, në jug dhe në tërë vijën bregdetare në Shqipëri, pa përjashtuar vilat në Tiranë dhe periferi të Tiranës, apo vilat dhe resortet turistike jashtë vendit, kryesisht në Malin e Zi dhe në Kroaci.

Në gjirin e Lalzit ka shkuar Inspektorati i Mbrojtjes së Territorit, i cili po ndërhyn tek shtesat pa leje të këtyre vilave të qeveritarëve dhe pjestarëve të sistemit të drejtësisë shqiptare. Duke qënë se kanë bërë dhe ndërtime pa leje, ky do të jetë si një pretekst për të sonduar pronarët e vërtetë të këtyre vilave, përmes prishjes së tyre. Teksa do të shohin ndërhyrjen nga ?lart?, atëherë do të verifikohet se në pronësi të kujt janë. Nuk flasim këtu për vilat e Berishës, Metës apo dhe e ish ministrave socialistë, të cilat janë të deklaruara dhe janë në verifikim të plotë, pavarësisht nivelit të ultë të shpenzimeve të regjistruara në deklaratat e pasurisë që janë blerë.

Verifikimi i vlerës së tyre me çmimin e tregut do të bëhet përmes arkitektëve apo inxhinierëve të specializuar të ndërtimit, sipas modelit që përdorin bankat e nivelit të dytë që verifikojnë kolateralin si garanci për të dhënë kredi. Pra me vlerën reale dhe jo atë të deklaruar në shtet, si blerje apo pagesë tatimfitimi të atij që e ka shitur. Njëherësh pritet që të bëhet dhe përllogaritja e tyre.

Sondimi do të bëhet dhe në ndërtesa të tjera, duke i shpallur si penguese të investimeve strategjike, dhe në bazë të kërkesës për dëmshpërblim, meqënëse janë me leje do të nxirret dhe kostoja e vërtetë.

Nga ana tjetër mësohet se do të fillojë në masë dhe verifikimi i disa kompanive të inerteve, të kromit dhe të shfrytëzimit të malit të Tomorrit për nxjerrjen e mermerit, për të parë në pronësi të vërtetë të kujt janë. Këto do të jenë objekt i tatimeve, i ministrisë së Mjedisit për lejet mjedisore, dhe do të ndërmerren masa drastike për të bërë bllokimin e tyre. Për më tepër që deklarohen të gjitha me humbje.

Duke i bllokuar, të gjitha këto biznese, do të shikohen sinjalet e ndërhyrjeve dhe për pasojë do të verifikohen dhe pronarët e vërtetë të tyre, pa përjashtuar këtu joshjen e atyre që kanë vënë emrin për llogari të ndonjë pushtetari në pronësinë e këtyre bizneseve. Mësohet se skema që do të përdoret është e njëjtë me skenarin kroat, skenar që çoi në burg ish-kryeministrin, ministra, zyrtarë të lartë dhe përfaqësues të drejtësisë. SHBA ka deklaruar një mbështetje të fortë, madje dhe me ekspertë për këtë qëllim./Pamfleti.com/