Aleatët e Bashës dhe “qurrashët politikë” të Lulit

14 Gusht 2017, 09:12, Aktualitet CNA

Në tre ditët e fundit, disa nga aleatët kryesorë dhe me peshë elektorale të Partisë Demokratike po mbajnë qëndrime të forta ndaj kreut demokrat, Lulzim Basha, i cili është zhdukur pa adresë në ishujt ekzotikë, për të pushuar, duke harruar detyrën e tij si kryetar i partisë më të madhe të opozitës.

Dashamir Shehi kërkoi që ministrat të largohen nga qeveria. Për më tepër, ai drejtoi gishtin nga Lulzim Basha, si një kryetar opozite, që nuk solli asgjë të re në zgjedhjet që shkuan dhe e bëri atë përgjegjësin kryesor të humbjes katastrofike në zgjedhjet e 25 qershorit.

Në një intervistë tjetër sot, Fatmir Mediu, kreu i Partisë Republikane, ka mbajtur një qëndrim të fortë ndaj Lulzim Bashës, thuajse të njëjtë me atë të Dash Shehit, ndoshta dhe më radikal. I vetmi që deri tani është në krah të Lulzim Bashës është aleati më ?serioz? i tij, Nard Ndoka.

Kreu i Agrares, Agron Duka, ditën pas zgjedhjeve drejtoi gishtin te PD dhe strukturat e saj të shpartalluara në fushatë elektorale.

Janë katër zëra kryesorë, të cilët kanë peshë specifike elektorale, Nard Ndoka në periferi dhe në zonën e Shkodrës, ndërsa të tjerët me peshë historike dhe reale.

E ndërsa ata flasin dhe kërkojnë që Basha të bëjë opozitë, të tërheqë ministrat dhe të marrë përgjegjësi, disa mbështetës të Lulit, nga ata ?qurrashët politikë? që e çuan në katastrofën elektorale të 25 qershorit, nga ata që marrin rroga në selinë e PD, nga ata që pretendonin shumë, por Luili i hodhi në kosh të plehrave, nga ata që i thonin Bashës se do merrte 65 mandate, nga ata që vlejnë hiç, dalin dhe sulmojnë aleatët e PD, aleatë me peshë të fortë elektorale, si PAA e Dukës, LZHK e Shehit apo PR e Mediut.

Aleatët sulmohen, ndërsa Luli nxihet në diell, pasi ka regjistruar dy humbje, një më 25 qershor dhe një më 22 korrik. Tek e para humbi garën me Edi Ramën, aleatin e tij të ri. Tek e dyta humbi garën brenda partisë, këtë herë me demokratët, që e braktisën duke mos e mbështetur.

Analiza e PD duhet të fillojë nga këto dy pika dhe jo nga sulmi ndaj aleatëve. E ndërsa në maj, këtyre aleatëve Lulzim Basha iu lutej që të ishin në siglën e PD, nuk iu dha të drejtën e një koalicioni të vërtetë pas marrëveshjes me Edi Ramën. I mori përdore për të shtuar thesin e tij, që të tregonte se PD si sigël ishte rritur, por në fakt edhe me këtë lëvizje rezultati i tij ishte katastrofik. Ndërkohë që këta aleatë, sipas trendit dhe rezultateve të vazhdueshme elektorale, mund të kenë kontribuuar në koshin e 25 qershorit me afërsisht 100 mijë vota për PD.

Sot sulmohen dhe iu kërkohet llogari pse flasin ndaj Lulit. Në fakt Luli nuk është lulja mos më prek, por është Lulzimi që çoi PD në dy dështime të njëpasnjëshme zgjedhore. Tani aleatët kërkojnë llogari, sepse pas rrudhjes së PD mund të ndodhë dhe rrudhja e tyre. Lulzim Basha i tradhtoi, i keqpërdori, iu udhëhoqi një katastrofë elektorale dhe tani nuk kanë të drejtë të flasin, sepse disa ?qurrashë? që rrinë pas Lulit ndihen keq.

Në fakt, nuk është Lulzim Basha që iu ka bërë nder aleatëve, por janë ata që gabuan duke pranuar të garonin në një sigël, por në rast se do ndodhte kjo ndoshta sot Basha nuk do kishte 450 mijë, por as 350 mijë vota dhe gjëma do vazhdonte më tej, ashtu siç pritet të ndodhë me Lulzim Bashën në krye të PD dhe ?qurrashët politikë?, që i mbajnë ison dhe kurrë nuk i thonë të vërtetën./CityNews