Nga Bislim AHMETAJ/ Kukësit dhe Shqipërisë i mungon përmendorja e Havzi Nelës!

11 Gusht 2017, 11:00, Aktualitet CNA

Një vit më parë paskam thënë në një koment timin në fb: Pse nuk mblidhet Keshilli Bashkiak i Kukesit të marrë vendim për ngritjen e permendores së poetit Havzi Nela, përmendore e cila duhet vendosur pikerisht në vendin ku mëngjesin e 10 gushtit të vitit 1998 banorët e qytetit e gjetën të varur në trekëmbësh, poetin që i shkruante jetës dhe lirisë, në dalje të qytetit që vendasit e quajnë ?te agjensia?.

Sot pas një viti po apeloj sërish për të njëjtën gjë , por tani me emra konkret. Dua ti therras mikut tim Petrit Palushi , shkrimtar dhe publicist i zëshëm në rrafsh kombëtar, i cili për fat jeton dhe vepron akoma në Kukës, përvec kësaj është edhe këshilltare për ceshtjet e artit dhe kulturës në bashkinë e këtij qyteti.

Dua gjithashtu ti thërras mikut, poetit dhe shkrimtarit të talentuar Sulejman Dida i cili po ashtu krijon dhe jeton në qytetin e tij të lindjes. Përmes këtyre dy emrave dëshiroj ti thërras gjithë komunitetin e artit dhe letërsisë që jetojnë në Kukës por edhe artistë dhe shkrimtarë kuksianë që jetojnë në rrethe te tjera të vendit dhe në diasporë si Izet Duraku, Shefqet Hoxha, Rexhep Shahu,Enver Bytyci, Kujtim Morina etj që të solidarizohen dhe të sensibilizojnë vendimarrjen lokale dhe qëndrore për nisjen e punës për ngritjen e përmendores së Havzi Nelës.

Të njëjtën thirrje kam edhe për mikun tim të hershëm Arif Rexhmati kryetar i Partisë Demokratike në këtë rreth dhe njëhërësh kryetar i grupit të këshilltareve demokratë në këtë bashki. I cili për hirë të së vertëtës e ka propozuar këtë ide në Këshillin Bashkiak para rreth një viti dhe propozimi i tij është rrëzuar me votat e bashkuara të partisë së djalit të atij që vendosi varjen e Havzi Nelës. Vota pro për ngritjen dhe vendosjen e përmendores së Havzi Nelës e këshilltarëve të partisë së djalit të atij që vendosi për varjen e tij jam i sigurte që nga opinion lokal dhe ai kombëtar do të lexohej si një shenjë pëndese, si një kërkim falje, si një apel për pajtim dhe bashkëjetesë.

Unë i besoj urtësisë së njerëzve të thjeshtë kur ata lihen të lirë në gjykim. Ndaj këtë thirrje e kam edhe për ju që përfaqësoni në këshillin bashkiak partinë e djalit të atij që urdhëroj varjen e poetit. Kjo thirrje shkon edhe për deputetin Flamur Noka dhe për të gjithë njerëzit me influencë të këtij rrethi kudo ku ata jetojnë e veprojnë. Të majtë e të djathtë, është në nderin e tyre të nderojnë poetin e fjalës së lirë. Përmendorja e Havzi Nelës rritë edhe vlerat tuaja nëqoftëse bëhëni pjesë e angazhimit për vendosjen e saj.

Kjo thirrje në mënyrë të vecantë është për kryetarin demokratë të Bashkisë së Kukësit, zotin Bashkim Shehu i cili duhet të shfrytëzoj të gjithë kopetencat dhe autoritetin që i jep pozita e tij si kryetar në mënyrë që përmendorja e Havzi Nelës të inagurohet me 10 gusht të vitit 2018, datë që shënon 30 vjetorin e varjes së poetit. Sheshet e Shqipërisë vazhdojnë akoma sot e kësaj dite të jenë të mbushura me buste dhe monumente vrasësish me pagesë që partia e punës i veshi me lavdi dhe hymne.

Ndërsa heronjtë e vertëtë të qëndresës, të luftës për liri dhe pavarësi, martirët e fjalës së lirë dhe të prosperitetit tonë kombëtarë janë të gjallë vetëm në memorin e njerëzve të lirë që fatkeqësisht akoma janë pakicë në këtë vend. Kukësit në mënyrë të vecantë por edhe Shqipërisë I mungon përmendorja e poetit që u denua me varje vetëm e vetëm se e donte jetën, familjen e tij dhe Atdheun. Kuksianët por edhe ne të gjithë shqiptarët e lirë ja kemi borxh qytetit dhe Atëdheut përmendoren e tij./CityNews