Deputeti i Bashës zbulon “revolucionin” e 25 qershorit/Po ha bijtë e vet!

19 Korrik 2017, 08:24, Aktualitet CNA

Deputeti i Partisë Demokratike, Luçiano Boçi, i është rikthyer edhe njëherë rezultatit të zgjedhjeve të 25 qershorit, duke hedhur akuza për shit-blerje votash.

Në rrjetet sociale, Boçi shkruan se si asnjëherë tjetër OSBE-ODIHR konfirmoi se në vendin tonë ka ndodhur një ?revolucion? i vërtetë, ai i SHIT-blerjes së votës.

Më tej, ai akuzon direkt kryeministrin Edi Rama, duke thënë se ai përsërit pushtetin e ti me ?revolucionin? e SHIT-it.

Ja reagimi i plotë:

Revolucioni i SHIT-blerjes së votës!
Si asnjëherë tjetër, OSBE-ODHIR-i, konfirmoi se në vendin tonë ka ndodhur një “revolucion” i vërtetë!!!
Ai i SHIT-blerjes së votës. Thëne shkurt “Revolucioni i SHIT-it”, me të cilën Rama përsëriti pushtetin e tij!
Dhe “Revolucioni” nuk harron. I kthehet gjithmonë zakonit:
Pas triumfit fillon e ha bijtë e vet! Dhe ky i SHIT-it kështu po bën.
Këto “bijë” janë “kockat” që i hidhen popullit në emër të popullit, për të marrë nga ai dhe lavdinë:
– Drejtori i Aluiznit Berat, bashkë me të tjerët drejtorë të shënuar në “listën e zezë” të Ramës, janë pjesë e Skuadronit “Kafka dhe Legalizime”, të blerjes së votës. Me “urdhër nga lart” për katër vite me rradhë, këta legalizuan edhe qentë e macet e rrugës, me Lamen e relikave, përmes mijëra shkeljesh, marifetesh e rryshfetesh, vetëm e vetëm me “lyp” e me ia “hyp” me zor votës.
– Bosët e drogës, të cilët sot Rama i pranoi vetëm pasi “gjeli këndoi tri herë”, nuk janë gjë tjetër, veçse “Trupa Elitë” e financimit dhe blerjes e trysnimit të votës. Ndonjëri nga ata, sipas KM, do e hajë e do bjerë hero, në emër të qindrave të tjerë që do mbeten, afër udhëheqjes, e cila do i nderojë përjetë!
– Policët, disa fukarenj prej të cilëve Çako po “i shkrin” en bloc, sepse kanë “llap pak si shumë”, janë pjesë e “Delta Votë-s” shtetërore, që bashkëpunuan thellësisht me krimin e çdo ngjyre për katër vite, në drogë, pastrim parash e tyrli “punësh”, për hir të rrëmbimit e blerjes së votës. Për Çakon e Ramën betejat kanë dhe “dëshmorët” e tyre. Lavdi “dëshmorëve”!
– Inspektorët e INUK-ut që “po dalin për skrap”, me urdhër të Ramës, për mosveprim, ishin pikërisht anëtarë aktivë të mega-grupit “Mashtro-Mbyll një sy-Kërcëno” për mbledhjen “me dashuri” të votës, kudo në terren ku vlonin ndërtimet pa asnjë leje. Ca nga këto dinë më shumë se ç’duhet, për mbylljen e syve, ndaj duhen eleminuar si “armiq” të shtetit tonë “të fuqishëm”.
– Ka dhe të tjerë…..për të cilët pritet vetëm gishti i kryerevolucionarit.
Rroftë Revolucioni i SHIT-it!!!!!/CityNews