E fundit!

09:48 Ekonomi

Kriza e prodhimit bujqësor/ Sfidat dhe pasiguritë në sektorët kryesorë

Sektori i bujqësisë përballoi një vit mjaft sfidues gjatë ...

Ekskluzive-Nga Kastriot MYFTARAJ/Pse nuk mund të mbahen zgjedhje “të parakohshme”, para 18 qershorit

21 Prill 2017, 17:52, Aktualitet CNA

Në media ka qarkulluar një skenar politik, sipas të cilit Edi Rama dhe Ilir Meta po e përdorin procedurën për zgjedhjen e Presidentit të Republikës për të shkaktuar zgjedhje të parakohshme në vend, do të thotë zgjedhje që do të mbahen para 18 qershorit. Këtë skenar politik e ka hedhur i pari në qarkullim këshilltari i Ilir Metës, Lorenc Vangjeli, në emisionin e Fevziut, dhe pastaj ka qenë ky i cili e ka zhvilluar deri në detaje në një analizë në faqen online të emisionit të tij. Kuptohet me porosi, për të parë reagimin ndaj tij. Sipas Fevziut, Rama dhe Meta do t? i djegin të pesë raundet e votimit për Presidentin e Republikës, pa e zgjedhur atë. Sipas Kushtetutës kjo e çon vendin në zgjedhje të parakohshme, që sipas Fevziut i takon të mbahen në 11 qershor.

Me këtë rast procedurat zgjedhore do të nisnin nga e para dhe PD dhe aleatët e saj do të mund të regjistroheshin për të marrë pjesë në zgjedhje. Gjithashtu, me dështimin e shumicës parlamentare të sotme për të zgjedhur Presidentin, do të gjendej një shkak tjetër përveç kërkesës së opozitës (alibi nëse doni) për të krijuar një qeveri teknike, pasi dështimi i shumicës parlamentare për të zgjedhur Presidentin, quhet sipas Kushtetutës rënie e shumicës parlamentare të sotme. Kjo është ideja. Sa mundësi ka që të realizohet ajo?
Kushtetuta thotë se kur Kuvendi dështon që të zgjedhë Presidentin e Republikës në të gjëthë raundet e votimit, atëherë brenda 45 ditësh mbahen zgjedhje parlamentare. Kuvendi tashmë e ka caktuar raundin e tretë të votimit për zgjedhjen e Presidentit në 27 prill. Nëse digjet edhe ky raund, dhe duhet të mbahen dhe dy të tjerët pas tij, në çdo rast kjo nuk mund të ndodhë para datës 2 maj. (1 maji është ditë feste, Kuvendi nuk mund të mblidhet për të zgjedhur Presidentin.)
Në 3 maj, Presidenti i Republikës Bujar Nishani, i cili ka tagrin që të shpallë mbajtjen e zgjedhjeve, do të gjendet në situatën kur, nga njëra anë duhet të shpallë zgjedhjet brenda 45 ditëve, në anën tjetër ka një dekret të tij që është në fuqi për mbajtjen e zgjedhjeve në 18 qershor, që do të thotë brenda 45 ditëve! A do të bëhet Nishani Presidenti që në përfundim të mandatit të tij do të legalizojë një manovër politike që kryhet me çmimin e talljes me institucionin e Presidentit të Republikës? (Komedia me pesë akte e pesë raundeve të djegur të votimit për zgjedhjen e Presidentit) Duke supozuar se Presidenti Nishani, nuk është krejt palaco politik, mund të thuhet se ai nuk do të bëhet aktor në këtë komedi, ku është vënë në lojë institucioni i Presidentit, togfjalësh që ai e ka shumë të shpeshtë në fjalorin e tij.
Nëse do të ketë minimumin e seriozitetit institucional, Presidenti Nishani do të thotë se ngjarja e re, shpërndarja e Kuvendit për shkak të moszgjedhjes së Presidentit të ri, nuk ka nevojë për një datë të re zgjedhjesh, pasi ka koinciduar që data qershor, tashmë e përcaktuar si ditë e mbajtjes së zgjedhjeve, të përmbushë afatin 45 ditor të kërkuar nga Kushtetuta për mbajtjen e zgjedhjeve të parakohshme. Në këtë rast partitë dhe kandidatët e pavarur do të kenë rreth dy javë kohë për të kryer procedurat paraprake zgjedhore.
Afati kushtetues 45 ditor për zgjedhjet e parakohshme është vënë pikërisht që partitë të mund të kryejnë procedurat paraprake për zgjedhje, regjistrimin e tyre, të koalicioneve, dhe të kandidatëve pranë KQZ para nisjes së afatit ligjor të fushatës zgjedhore që është 30 ditë para ditës së zgjedhjeve. Për shkak se zgjedhjet duhet të mbahen ditën e dielë, Presidenti nuk ka alternativë tjetër veç datës 11 qershor për t? i afruar ato. Por mbajtja e zgjedhjeve në 11 qershor, duke u shpallur kjo datë nga Presidenti në ditët e para të majit, do të sjellë si pasojë që të shkurtohet shumë afati ligjor për kryerjen e procedurave paraprake zgjedhore për partitë dhe kandidatët e pavarur.
Nëse Presidenti Nishani shpall mbajtjen e zgjedhjeve të quajtura të parakohshme. në 11 qershor, atëherë do të ketë një javë afat për kryerjen e procedurave paraprake zgjedhore. Kjo do të koincidojë me javën e negociatave për krijimin e qeverisë teknike, procedurat për krijimin e së cilës nuk mund të mbyllen para fundit të javës. (Dekretim i kryeministrit të ri nga Presidenti, pastaj kryeministri i mandatuar bën listën e ministrave, ata dekretohen nga Presidenti, miratim nga Kuvendi, betimi para Presidentit.)
Procesi zgjedhor do të kompromentohet politikisht si kurrë ndonjëherë më parë që në fillimet e veta. Mund të ketë parti ose individë që duan të kandidojnë si të pavarur, të cilët do të ankohen në Gjykatën Kushtetuese, për atë se përse u shkurtua afati ligjor i dhënë nga Kushtetuta. Kur ky ?operacion? juridik presidencial koincidon të jetë bishti i një manovre politike, atëherë bien garancitë për zgjedhje të ndershme, duke nisur që nga zyra e kryetarit të shtetit./Shkruar per Citynews.al