Politikanët zhvatës e futën shtetin në komë

18 Prill 2017, 12:18, Aktualitet CNA

Republika, në ditët e saj më të vështira.

“Vdekja klinike e shtetit të Kosovës përkthehet në komoditetin e politikanëve karrieristë e zhvatës të shtetit, por edhe në interes të klaneve të caktuara për vazhdimin e degradimit institucional e pasurimin në kurriz të qytetarëve të Republikës”, tha Hidajet Ahmeti,raporton Gazeta Kosova Sot.

Njohës dhe pjesëmarrës të jetës politike e institucionale në vend, për gjithë këtë periudhë të shtetndërtimit të pasluftës, duke parë ngecjet e mëdha në fuqizimin e shtetit të ri, konsiderojnë se Republika është akoma në komë të thellë, për shkak të papërgjegjësisë së një pjese të madhe të politikës vendore, si në pozitë, ashtu edhe në opozitë. Sipas tyre, kjo gjendje është e tillë, ngase politika po shkon akoma drejt asgjësimit të shtetit ligjor. Për shkak të lidhjeve korruptive politika dhe drejtësia po e ushqejnë njëratjetrën në ‘tandem’ në udhën e paligjshmërisë së thellë e të skajshme në Kosovë, prandaj zgjidhja shihet vetëm nga një (r)evolucion demokratik paqë- sor, por i fuqishëm dhe i pandalshëm, për ta nxjerrë nga koma vendin, të cilin e ka katandisur keq klasa dërrmuese shumicë si politikë e papërgjegjshme, si në pozitë, ashtu edhe në opozitë. Deputeti i LDK-së, Adem Salihaj, konsideron kjo lëvizje pozitive si proces mund të arrihet vetëm me vetëdijesimin gradual të qytetarëve e që me siguri do të marrë kohë. “Kosovës i duhet një vetëdijesim i madh, për ta hequr gjithë këtë kalbëzim të shoqërisë, i cili ka kapluar çdo sferë . E keqja, e mishëruar në krim dhe korrupsion, nuk do të hiqet përderisa vetë qytetari nuk e bën së pari një revolucion në vetëdijen e tij, për ta dalluar qartë të keqen nga e mira. Kriminelët, bandat dhe hajnat e mashtruesit e llojllojshëm e shfrytëzojnë mungesën e vetëdijes qytetare për ta zhvatur Kosovën në të gjitha mënyrat e mundshme”, potencoi Salihaj

Vdekja klinike e shtetit

Edhe analisti Hidajet Ahmeti konsideron se është fakt që Kosova si shtet është në vdekje klinike, por fillimisht duhet stabilizuar. “Shteti i Kosovës në kuptimin e qeverisës çalon në masë të madhe, pikërisht nga klasa politike udhëheqëse, pasi që mekanizmat e shtetit i kanë shfrytëzuar dhe po i shfrytëzojnë në interes të klaneve e klientelës së tyre partiake, e jo në shërbim të trupit publik. Ndryshimi i mendësisë e mbrapshtë qeverisëse me këta njerëz është utopike të mendohet, por duhet ndryshuar koncepti qeverisës e jo ndryshim fytyrash, por për ndryshim për nga logjika dhe mentaliteti qeverisës”, u shpreh ai. “Vdekja klinike e shtetit të Kosovës përkthehet në komoditetin e politikanëve karrieristë e zhvatës të shtetit, por edhe në interes të klaneve të caktuara për vazhdimin e degradimit institucional e pasurimin në kurriz të qytetarëve të Republikës. Legjislativi, ekzekutivi dhe Gjyqësori si tri shtylla të pushteteve në Kosovë e që në letër janë si të pavarura, funksionojnë brenda një komande të vetme, e cila çdo ditë e më shumë po dëshmohet. Legjislativi duke e reduktuar mandatin e tyre vetëm në ngritje duarsh e në shërbim të partive politike e jo interesave qytetare, Gjyqësori si balancues në mes të legjislativit dhe ekzekutivit është shndërruar në vatër të keqpërdorimeve e në shërbim të ekzekutivit, e realisht ekzekutivi është përfituesi më i madh nga kjo anarki e pushteteve, që realisht i bie se demokracia e në theks të veçantë pavarësia e pushteteve është vetëm në letër”, theksoi Ahmeti. Sipas tij, pavarësimi i tri pushteteve në shtetet demokratike është garanci për stabilitet e funksionim normal brenda kornizave demokratike.

Korrupsioni galopant

Prof. Riza Smaka pohon se gjendja shoqërore në të gjitha fushat, si ajo socio-ekonomike, shëndetësore, arsimore dhe edukative në vendin tonë aktualisht ndodhet si e më keq, dhe krejt kjo si pasojë e kësaj klase politike që po qeveris vendin. “Sistemi i drejtësisë dhe për shkak të financimit joadekuat nga Qeveria, lëngon nga shumë e shume defiçienca më se të ndryshme. Format korruptive më se të ndryshme e të shumta të aplikuara nga pushtetarët përkatësisht qeveritarët, praktikisht jo që nuk luftohen, por, implicite, stimulohen dhe vijojnë të lulëzojnë”, tha prof. Smaka. Sipas tij, në vendin tonë, edhe kur shkelet Kushtetuta, por edhe ligjet pothuajse nuk ekziston përgjegjësi apolitike as funksionale, prandaj vetëm një revolucion i ri elektoral mbetet shpresa e ndryshimeve pozitive. “Një nga zgjidhjet e mundshme do të mund të shpresohej në zgjimin e së paku qytetareve “të fjetur” deri tani në procedurat elektorale, ashtu të zgjoheshin dhe të votonin, kurrsesi jo më ekskluzivisht për personat e mitizuar, por për qytetarët me vlera civile, intelektuale e etike dhe me shkallë adekuate të profesionalizmit të argumentuar konkretisht!”, tha Smaka. Ndërsa prof. Muhamet Kelmendi konsideron se politika e ka kapur ashpër Prokurorinë dhe Gjyqësorin, sikundër edhe shërbimet e institucionet e tjera të shtetit, e që janë kompetente për zbatimin e ligjit. “Për shërimin e gjendjes së tillë janë të nevojshme të ndërmerren disa masa të domosdoshme në shërbim të vendit: Rruga evolutive dhe zhvillimore, që është e ngadalshme dhe shumë e vështirë për të arritur. Rruga e ndërrimit të politikës me zgjedhje, që nuk mundet kurrë të krijojë gjendje të shërueshme brenda një periudhe të shkurtër, spastrimi i figurave të politikës dhe të tërë sistemit të rendit të sigurisë me ligj mbi largimin e elementeve të dyshimta, të ish-shërbëtorëve të sistemit militar dhe të çdo personi të inkriminuar, si dhe ndërrimet revolucionare në politikë, në ekonomi, në rende e siguri, kudo në pushtet”, theksoi ai./CityNews