PAS-KUINTAVE/ LSI, PDIU dhe PD negociojnë koalicionin e ri për Qeveri Teknike

5 Prill 2017, 11:48, Aktualitet CNA

Mediat ?tradicionale?, vijojnë të kanë në fokus fatin e vijimësisë apo ndërprerjes së marrëveshjes PS-LSI, ndërkohë që një tjetër marrëveshje është duke u negociuar prapa perdeve të politikës shqiptare.

Një skemë e cila pritet të risjell në skenë një koalicion i ri. Jo atë tradicional PS-LSI, por një tjetër krejtësisht të ndryshëm nga sa analizohet dhe diskutohet, e që mund të nxjerrë jashtë loje Partinë Socialiste, lëvizjet e të cilës veçanërisht pas darkës së peshkut tek ?Pazari i ri?, midis Metës dhe Ramës, janë shtuar shqetësueshëm.

Rrugënisja e këtij koalicioni surprizues është një tjetër darkë e Ilir Metës, pas asaj me Edi Ramën, në po të njejtën zonë të Pazarit të ri?, madje po në një lokal peshku, me asortimente deti. Fjala është për darkën që kryetari i LSI-së dhe i Parlamentit, Ilir Meta hëngri në bashkëshoqëri me kryetarin e PDIU, Shpëtim Idrizi.

Burime politike tepër konfidenciale i thanë CityNEWS, se darka Meta-Idrizi ka patur në qendër gjetjen e një rrugëzgjidhjeje që të ndal thellimin e mëtejshëm të krizës, gjë që mund të vij vetëm nëse PD arrin të bindet për tju rikthyer jetës parlamentar.

Hyrja në Parlament e deputetëve të PD sjell edhe heqjen e ?çadrës së lirisë? nga nëndritarja e zyrës së kryeministrit Rama, por edhe çlirimin e trurit të Lulzim Bashës nga ideja fikse e ngritjes së një Qeverie Teknike pa Edi Ramën kryeministër. Kërkesë kjo të cilën Edi Rama e ka hedhur poshtë duke e komentuar si ?të panegociueshme?, e që i ndan palët në papajtueshmëri.

Për të dalë nga kjo gjëndje e rendë, Ilir Meta ka marrë flamurin e negociatorit, për të nxjerrë si skemë zhbllokuese nxjerrjen e një koalicioni të ri midis LSI,PDIU dhe Partisë Demokratike, i cili jo vetëm e prish aleancën e tij me PS, por e zgjeron më tej bashkëqeverisjen dhe shkuarjen në zgjedhje pa Edi Ramën e qeverinë e tij.

Burimet e sipërpërmendura thanë se, aktualisht, skema e sjelljes në skenën politike krizuale e koalicionit të ri LSI,PDIU,PD është duke u negociuar, por nuk do të jetë çudi nesë ajo bëhet realitet brenda kësaj jave. Tradhëti, apo marrje iniciative për të zhbllokuar e ndalur thellimin e krizës? Mendoni si të doni. / CityNEWS