“Dorëzohen” socialistët për ligjin e plehrave/ PDIU-LSI deklarojnë votën kundër

11 Shkurt 2017, 08:35, Aktualitet CNA

Partia Socialiste, edhe pse jo zyrtarisht, duket se është dorëzuar në përpjekjet e saj për rrëzimin e dekretit të Presidentit Nishani për ligjin e importit të plehrave. Kanë kaluar disa muaj tashmë nga rrëzimi që Presidenti i bëri ligjit, por PS duket se nuk ka arritur dakordësinë me aleatët e saj për të bërë të mundur rrëzimin e ligjit. Kjo është parë qartë në mungesën e bisedimeve dhe tryezave me aleatët dhe grupet e interesit.

Ligji është parashikuar të votohet në datën 23 shkurt, por duke parë mungesën e dakordësisë, me shumë mundësi dekreti do të shtyhet përsëri. ?Sot? ka mësuar se Lëvizja Socialiste për Integrim dhe PDIU nuk kanë ndërmend të lëshojnë pe nga qëndrimi i tyre fillestar, se ligji për importin e plehrave duhet të arrijë dakordësinë e të gjithë faktorëve para se t?i hapet drita jeshile. ?LSI do të mbajë të njëjtin qëndrim që e ka bërë publik edhe më herët duke kërkuar dakordësi nga të gjitha palët. Vendimi ynë është gjithnjë në mbrojtje të interesave të qytetarëve dhe do të jetë politik?, deklaroi deputeti Robert Bitri. LSI ndër të tjera ka kërkuar rritjen e rolit të shoqërisë civile si edhe rritjen e kontrolleve në dogana, madje qëndrimi i saj u radikalizua pas zhvillimit të disa protestave nga shoqëria civile në lidhje me këtë çështje.

Të njëjtin qëndrim kundër vijon të mbajë edhe PDIU, e cila në momentin që ligji u miratua në Parlament braktisi seancën duke u shprehur kundër. Por kundërshtitë e aleatëve nuk janë arsyeja e vetme që pritet të çojnë shtyrjen përsëri të dekretit të Bujar Nishanit për ligjin e plehrave. Duke qenë se na ndajnë edhe pak muaj nga zhvillimi i zgjedhjeve të 18 qershorit, PS e di mjaft mirë se kalimi i një ligji të tillë mund të ketë kosto të mëdha elektorale në zgjedhje. Kanë qenë të shumta reagimet, protestat dhe kundërshtitë e shoqërisë civile në lidhje me çështjen e lejimit të importit të plehrave nga jashtë. Në këto kushte, PS mund të preferojë më tepër që të shmangë votimin deri në fund të këtij sesioni parlamentar dhe të lërë gjithçka për pas përfundimit të zgjedhjeve./CityNews