E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Koha për opozitën e PD

29 Janar 2017, 12:19, Aktualitet CNA

LSI, kohët e fundit ka filluar të marrë rolin e protagonistit opozitar. Artikulimet dhe qëndrimet e krerëve të saj apo ministrave janë edhe më të ashpra se të Partisë Demokratike. Nga ana tjetër, deputetët e PS, në mënyrë sporadike i përgjigjen Ilir Metës, por ata janë kryesisht zëra jashtë rreshtit politik i Partisë Socialiste.

LSI bën opozitën në qeveri dhe ndoshta Edi Rama po fërkon barkun. Ndoshta një lojë dhe skenar për të dobësuar më tej PD dhe opozitën në prag të zgjedhjeve parlamentare. Meta ka qëndrime dhe gjithë më të ashpër se PS. Reagon për drogën si Basha, reagon për Balilin si Basha, duke i quajtur tezat e tij. Bën flamurtarin e Reformës në Drejtësi duke shpallur veten konsensual. Sillet si të ishte në opozitë, jo në pushtet. Nuk i ka ngelur gjë tjetër veçse të ikë nga qeveri dhe të ngelet në opozitë.

Këtë Ilir Meta nuk e bën sepse ai është njeriu që ?vdes? për pushtet. Ai është i gatshëm të bëjë çdo intrigë, të qëndrojë në qeveri dhe të sillet në opozitë. Të kërcënojë Ramën dhe të sillet sikur do bashkohet me Bashën, apo duke syrin Bashës se do braktisë Ramën.

Tani është koha të flasë opozita. Është momenti kur duhet të flasë Lulzim Basha. Është momenti kur kreu demokrat duhet të reagojë ashpër dhe fortë ndaj Metës, për ministrat dhe skandalet e tyre. Është momenti kur opozita duhet të tregojë se është ajo zëri i qytetarëve dhe jo Ilir Meta. Ky i fundit është thjesht dhe vetëm një nga këmbët e Ramës, e mesit ose jo është këmba e tij.

Për Partinë Demokratike është momenti kur duhet të flasë për të mos lejuar që ti rrëmbejnë pozicionin e saj politik. Ilir Meta dhe LSI janë duke i vjedhur opozitarizmin. Hapësirë që në fakt ja ka dhënë Lulzim Basha, duke shpresuar në një konflikt të thellë midis Ramës dhe Metës, por pa llogaritur se kreu i LSI përveç socialistëve mund të kërkonte të kapte terren tek demokratët duke u sjellë si opozitë edhe pse është një nga forcat kryesore në qeverisje.

PD duhet të flasë dhe të tregojë se LSI është po aq përgjegjëse sa edhe PS në qeveri, është forcë e mzhorancës jo e opozitës. LSI është banda e dytë më e madhe në pushtet. Një bandë me të korruptuar që fillon nga ministria e transporteve, shkon tek Bujqësia, Mjedisi apo Integrimi, shkon tek Drejtoria e Rrugëve, tek sigurimet shoqërore, tek ilaçe e kudo tjetër. Shkon aty ku banda e LSI ka pushtet dhe këtë PD duhet ta thotë me zë të lartë për ti treguar shqiptarëve se dështimet e qeverisë janë edhe të LSI, korrupsioni i qeverisë është edhe e LSI, droga e qeverisë është edhe droga e LSI-së, Klement Balili i qeverisë është i LSI, Emiljano Shullazi i qeverisë është edhe LSI, krimi dhe korrupsioni i pushtetit janë edhe të LSI.

Partia Demokratike është në një moment delikat dhe duhet të zgjedhë dhe të marrë një pozicion të qartë për të mos lejuar askënd të kapë vendin e saj. Basha duhet të mbyllë çdo rrugë komunikimi apo aksion me Metën. Ai duhet të dalë përballë shqiptarëve me alternativën e vërtetë të opozitës, të godasë fort dyshen Rama-Meta. Në të kundërt, shumë shpejt, ekzistenca e opozitës mund të vihet në dyshim. E vetmja zgjidhje është që PD të marrë rolin e saj opozitar, të mos lejojë LSI të luajë rolin e saj dhe në fund ti tregojë shqiptarëve se PD është opozita dhe e vërteta. Ilir Meta është korrupsioni dhe qeveria.