Mungesa e shpërblimit/ Reagon Sindikata e Arsimit Pukë

4 Janar 2017, 14:58, Aktualitet CNA

Sindikata e Pavarur e Arsimimit Dega Pukë ka reaguar për mungesën e shpërblimit të fundvitit nga Ministria e Arsimit.

Përmes një deklarate për shtyp, sindikata shprehet se kërkesa e tyre për shpërblimin nuk u mor parasysh. Sipas saj, poshtërimi i mësuesve anëkënd Shqipërisë, kuptohet lehtësisht se është platformë dhe mentalitet i çdo hallke qeverisëse, mjafton të shohësh pompozitetin e drekave dhe darkave që shtrohen me mësues militantë dhe drejtorë shkollash të spikatur për të vetmin përkushtim dhe arritje si pionerë të partisë.

Sindikata thekson se nuk do të lejojë të nëpërkëmbet dinjiteti i tyre dhe të trajtohen si mall elektoral që këmbehet me qejfin e tekave dhe kapriçiove të institucioneve arsimore.

Më poshtë, deklarata e plotë

Kërkesa jonë për dhënien e shpërblimit vjetor për mësuesit, drejtuar ministres së arsimit znj. Lindita Nikolli, jo vetëm që nuk mor në konsideratë, por, përkundrazi pati një përpjekje të pashembullt për të inskenuar një parodi të turpshme që luhej në korridoret dhe sallonet e palaçollëqeve të dikastereve ministrore.

Poshtërimi i mësuesve anëkënd Shqipërisë, kuptohet lehtësisht se është platformë dhe mentalitet i çdo hallke qeverisëse. Mjafton të shohësh pompozitetin e drekave dhe darkave që shtrohen me mësues militantë dhe drejtorë shkollash të spikatur për të vetmin përkushtim dhe arritje si pionerë të partisë, aty do të gjejmë të mishëruar “arsimin e gjeneratës tjetër”, i cili në thelb është shprehje e dhunimit të dinjitetit profesional të mësuesit. Përtej fjalimeve konvencionale, të mbushura me shpikje arritjesh dhe reformash të suksesshme, përtej cikërrimës së gotave nga ku ndërdhëmbëzohet cinizmi i urimeve solemne për mësuesit, Sindikata e Pavarur e Arsimit të Shqipërisë, Dega Pukë denoncon organizimin farsë të të tilla veprimtarive si tubime me prapavijë politike. Nëse, zinxhiri ministror i arsimit, duke filluar nga ministrja dhe deri tek zyrtarët e saj në çdo njësi arsimore kanë prioritet vlerësimin e figurës së mësuesit, atëherë duhej t’u kishin dhënë shpërblimin e fundvitit prej 10 mijë lekësh si një e drejtë ligjore, të cilën këta ua mohuan padrejtësisht.

Drekat dhe darkat festive me mësuesit, me përzgjedhje partishmërie, të organizuara nga kryetarët e PS-së nëpër qarqe, por që trukoheshin me buzëqeshjen e ëmbëlt të ministres së arsimit, janë kartolina e talljes dhe nëpërkëmbjes së dinjitetit të mësuesve që vjen në prag të festave.
Mësues të nderuar!
Përtej frymës së përçarjes, përtej metodave diferencuese me të vetmin kriter partitizmin, përtej dhunimit të dinjitetit tuaj profesional, pohojmë, se lëvizja sindikaliste do të vazhdojë në mbrotje të principeve dhe të të drejtave tuaja. Ne nuk do të lejojmë që askush të nëpërkëmbë dinjitetin tonë, ne nuk do të lejojmë që të trajtohemi si mall elektoral që këmbehet me qejfin e tekave dhe kapriçiove të institucioneve arsimore.