E fundit!

08:16 Ekonomi

Izolimi rajonal, 22% e qytetarëve të Ballkanit nuk udhëtojnë fare te fqinjët

Pavarësisht përpjekjeve shumëvjeçare për bashkëpunim rajon...

Rikonstruksioni i Shtëpisë së Flamurit në Korçë/Moikom Zeqo: Jashtë kritereve,

9 Dhjetor 2016, 08:18, Aktualitet CNA

Shtëpia e Flamurit, ku në 1916 u shpall krahina autonome e Korçës shembja e saj në vitin 2012 u cilësua si një masakër kulturore nga specialistë të fushës së trashëgimisë. Por dhe rindërtimi i saj, i cili tashmë ka nisur për specialistë të fushës është larg asaj që duhet, duke mos u zbatuar kriteret e duhura.

Forumi për Mbrojtjen e Trashëgimisë Kulturore reagon ashpër dhe e quan skandal atë që po ndodh në Korçë me këtë ndërtesë, ndërsa ka publikuar dhe disa foto ku tregohen skeletet e betonit për rindërtimin e saj. Për muzeumologun Moikom Zeqo kjo që po ndodh vjen në vijim dhe të shkatërrimeve në fushën e trashëgimisë në objektet që janë shpallur monument kulture. Ai pohon se për Shtëpinë e Flamurit në Korçë duhej të ishte një projekt i mirëmenduar me detaje për rindërtimin e saj.

?Unë e kam kritikuar gjithmonë Ministrinë e Kulturës për restaurimin e objekteve. Nëse e kam kritikuar që u bë Kalaja e Petrelës me dru, kjo që po ndodh me Shtëpinë e Flamurit është antishkencore që të bëhet e tillë. Nuk mundet një objekt që i bie të jetë nga fillimi i shekullit të njëzet ose që është nga fundi shekullit të 19 ta kesh vetëm beton? Për Shtëpinë e Flamurit në Korçë e kam pohuar dhe më herët, që duhet të ketë dy projekte. I pari është kthimi në identitet i ndërtesës, duke shfrytëzuar fotografi, apo të dhëna të tjera, dhe të respektohet deri në fund identiteti i asaj godine. Së dyti duhet të ketë një projekt muzeumologjik, sepse është një godinë që ka një ngjarje historike. Më vjen keq që nuk ka mjeshtra të restaurimit për këtë punë?, pohon arkeologu dhe muzeumologu Zeqo.

Duke pohuar se nuk ekzistojnë mjeshtrat e restaurimit, që janë profesionistë, ai sjell në vëmendje dhe një tjetër shembull me shkatërrimet që janë bërë në objektet monument kulture. ?Dikur patëm një shembull që qe katastrofik. Rindërtimi i Hamamit në Krujë, që qe mbuluar me një mermer të bardhë. Kjo jo vetëm që ishte antishkencore, por është dhe një formë e mashtrimit dhe manipulimit. Shtëpia e Flamurit në Korçë nuk ka qenë beton, ka qenë një ndërtesë fundit i shekullit të 19 fillimi i shekullit të njëzet. Por në Institutin e Monumenteve të Kulturës nuk ka më profesionistë. Shtëpia e Flamurit duhej të kishte një vëmendje për kthim në identitet. Po e shikojmë mirë që gjërat në Shqipëri bëhen nga njerëz jo profesionistë?, vijon më tej në reagimin e tij muzeumologu Moikom Zeqo.

Forumi, skandalet nuk kanë të ndalur

Forumi për Mbrojtjen e Trashëgimisë Kulturore, i cili ka publikuar dhe foto për atë që po ndodh me Shtëpinë e Flamurit në Korçë mes të tjerave në postimin e bërë në Facebook shkruan se skandalet tashmë nuk janë më vetëm në fushën e restaurimeve, por dhe në ato të rikonstruksioneve historike. ?Instituti i Monumenteve të Kulturës ka ngordhur përfundimisht! As një copë vilë me gur e me tullë nuk është më në gjendje të realizojë sikurse ka qenë, pra sipas motos tashmë të njohur “com’era, dov’era”. Por ndoshta stafi i injorantëve, që drejton institucionin e rëndësishëm as që e ka dëgjuar këtë koncept. Shtëpia dy katëshe e Flamurit në Korçë po rindërtohet me skelet beton/arme, dhe kjo është vërtetë brengosëse. Skandalet tashmë nuk kanë të ndalur jo vetëm në fushën e restaurimeve, por edhe në atë të rikonstruksioneve historike?, thuhet në postimin e bërë nga Forumi për Mbrojtjen e Trashëgimisë Kulturore në Facebook. Paaftësia më e madhe në këto 50-vjet duhej të kulmohej pikërisht me këtë objekt kaq të thjeshtë dhe identitar, përfundon postimi i bërë nga Forumi.