Fatos Klosi: Ja 3 çështjet që sollën në Tiranë kreun e CIA

9 Dhjetor 2016, 08:01, Aktualitet CNA

Vizita e beftë në Tiranë e kreut të Agjencisë Qendrore të Inteligjencës, (CIA), John Brennan, nuk ka kaluar pa u vënë re, pasi kurrsesi nuk mund të ketë patur si qëllim diskutimi me zyrtarë të lartë të shtetit çështje të vogla dhe pa rëndësi. Ish-kreu i Shërbimit Informativ Shtetëror, Fatos Klosi, ka radhitur tre çështjet kryesore për të cilat kreu i CIA mendohet se ka ardhur në Tiranë. Sipas Klosit, një nga çështjet që mund të ketë qenë objekt diskutimi midis kreut të CIA dhe zyrtarëve të lartë të shtetit, është çështja e muxhahedinëve. Ish-kreu i spiunazhit shqiptar argumenton se Presidenti i ri i SHBA, Donald Trump, ka deklaruar se do të ndjekë një politikë të re, duke u përqendruar te rritja ekonomike brenda vendit dhe çdo vend anëtar i NATO-s duhet të kontribuojë financiarisht për të ruajtur veten. Në këto kushte, Klosi sqaron se Amerika nuk do të mbrojë më dhe as do të financojë për muxhahedinët. Sipas Klosit, ndryshimi i politikës amerikane, edhe për çështjen e muxhahedinëve, do të rrisë rrezikun e Shqipërisë nga Irani, pasi qeveria shqiptare mori përsipër të strehojë 3 mijë përfaqësues të opozitës iraniane, që ky shtet i cilëson terroristë. Nga ana tjetër ka rrezik dhe nga vetë muxhahedinët. ?Një prej çështjeve të shumë diskutuara mund të ketë qenë çështja e iranianëve. Presidenti i ri amerikan do të acarohet me iranianët dhe iranianët do të rrisin ankesat ndaj nesh, pasi Shqipëria i ka marrë përsipër t?i strehojë. Kreu i CIA nuk vjen për gjëra të vogla. Vizita e tij në Tiranë është vlerësim për rolin e Shqipërisë dhe partneritetin me SHBA?, deklaroi Klosi.

Avancimi rus në Ballkan

Për ish-kreun e SHISH, Fatos Klosi, një tjetër arsye që mund të ketë detyruar kreun e CIA të vijë në Tiranë, është dhe ushtrimi i influencës ruse në Ballkan. Klosi sqaron se Rusia ka gjetur kohën e përshtatshme për të shtrirë influencën e saj në Ballkan, për shkak se Europa po përjeton krizën e Brex-it dhe është në konflikt me Rusinë për Ukrainën. ?Ushtrimi i influencës së Rusisë në Ballkan, është një çështje e vjetër. Por, Rusia ka gjetur kohën e përshtatshme për të shtrirë influencën e saj në Ballkan. Së pari, ka një konfrontim mes Rusisë dhe Europës për Ukrainën dhe së dyti, Europa po përjeton krizë për shkak të Brex-it. Në zgjedhjet që u zhvilluan në Bullgari fitoi një president filo rus, dhe e njëjta gjë ndodhi edhe në Moldavi?, thotë Klosi.

Kërcënimi terrorist

Sigurisht që në qendër të bisedimeve mes kreut të CIA dhe zyrtarëve të lartë të shtetit shqiptar, nuk mund të jetë lënë në hije kërcënimi terrorist nga ISIS. ?Çështje tjetër mund të ketë qenë dhe terrorizmi, edhe pse ISIS po humbet terren. Amerikanët e kanë deklaruar se tani duhet të merret Europa më shumë, pasi ISIS nuk do ndalë sulmet. Amerikanët kanë paralajmëruar Francën për t?u përgatitur ndaj një sulmi të radhës terrorist. Por mund të jetë dhe një arsye tjetër. Pas zgjedhjeve për President në SHBA, të cilat i fitoi Donald Trump, vizitë po u bëhet të gjitha shteteve aleate. Kjo vjen për shkak të qëndrimeve të Presidentit të ri. Zyrtarë të lartë të SHBA vijnë për të treguar se deklaratat e Trump ishin në kuadër të fushatës elektorale , dhe se nuk është Presidenti ai që përcakton politikën amerikane?, u shpreh Klosi.