Këshilli i BE-së miraton marrëveshjen tregtare me SHBA-në

25 Qershor 2026, 14:04, Kosova & Bota CNA

Këshilli i Bashkimit Europian dha sot miratimin përfundimtar për hyrjen në fuqi të marrëveshjes tregtare mes BE-së dhe Shteteve të Bashkuara të Amerikës, duke aprovuar dy rregulloret për zbatimin e angazhimeve tarifore të përcaktuara në Deklaratën e Përbashkët BE-SHBA të 21 gushtit 2025.

Me këtë vendim përfundon procesi i ratifikimit të marrëveshjes nga ana e BE-së, pas miratimit të saj edhe nga Parlamenti Europian javën e kaluar. Kjo i hap rrugën hyrjes në fuqi të marrëveshjes para afatit të 4 korrikut, të vendosur nga presidenti amerikan Donald Trump.

Sipas njoftimit të Këshillit të BE-së, përfundimi i procedurës legjislative konfirmon angazhimin e Unionit për një marrëdhënie tregtare transatlantike të qëndrueshme, të parashikueshme dhe me përfitime të ndërsjella, duke ruajtur njëkohësisht mekanizmat mbrojtës për interesat ekonomike europiane.

Dy rregulloret e miratuara parashikojnë heqjen e tarifave doganore të mbetura të BE-së për produktet industriale amerikane, akses preferencial për disa produkte detare dhe bujqësore amerikane përmes kuotave tarifore dhe tarifave të reduktuara, si dhe zgjatjen e pezullimit të tarifave për importet e karavidheve, përfshirë ato të përpunuara.

Marrëveshja është pjesë e kompromisit të arritur verën e kaluar midis Brukselit dhe Uashingtonit. Në kuadër të saj, BE-ja angazhohet të heqë shumicën e tarifave ndaj produkteve amerikane, ndërsa SHBA-ja kufizon në 15% tarifat e vendosura mbi importet europiane.

Dokumenti përfshin gjithashtu një mekanizëm të posaçëm mbrojtës, i cili i lejon Komisionit Europian të ndërhyjë shpejt në rast të një rritjeje të konsiderueshme të importeve nga SHBA-ja.

Nga ana tjetër, BE-ja ruan të drejtën të pezullojë preferencat e parashikuara nëse pala amerikane nuk respekton angazhimet e saj, përfshirë ato që lidhen me tarifat shtesë për produktet që përmbajnë çelik dhe alumin. Marrëveshja do të hyjë në fuqi një ditë pas publikimit të dy rregulloreve në Gazetën Zyrtare të Bashkimit Europian.

Rregullorja kryesore do të mbetet në fuqi deri në fund të vitit 2029. Deri më 30 qershor të atij viti, Komisioni Europian do të paraqesë një raport vlerësimi mbi ndikimin e saj në tregtinë BE-SHBA, të ardhurat doganore dhe ekonominë në përgjithësi, duke propozuar, nëse është e nevojshme, zgjatjen e zbatimit të saj.

Ndërkohë, rregullorja për importet e karavidheve do të ketë efekt prapaveprues nga 1 gushti 2025 dhe do të mbetet në fuqi deri më 31 korrik 2030.

BE-ja dhe SHBA-ja vazhdojnë të mbajnë marrëdhënien më të madhe dypalëshe tregtare dhe investuese në botë, e cila përfaqëson afërsisht 30% të tregtisë globale të mallrave dhe shërbimeve dhe 43% të Prodhimit të Brendshëm Bruto botëror. Tregtia dypalëshe e mallrave dhe shërbimeve tejkaloi 1.7 trilionë euro në vitin 2025, ndërsa investimet reciproke arritën mbi 4.8 trilionë euro në vitin 2024. /CNA