web counter
LEXO PA REKLAMA!

SHKARKO APP

App Store
Google Play

Shkatërrimet nga tërmetet në Venezuelë/ Vendet europiane ofrojnë ndihmë dhe avionë transporti

25 Qershor 2026, 13:34, Kosova & Bota CNA

Shkatërrimet nga tërmetet në Venezuelë/ Vendet europiane

Shtetet e Bashkuara të Amerikës, Kinë, Kili dhe vende të tjera i kanë ofruar ndihmë Venezuelës dhe po vijnë premtime të tjera mbështetjeje. Për situatën e shkaktuar nga tërmetet shkatërruese kanë reaguar edhe europianët.

Komisionerja e Bashkimit Europian për menaxhimin e krizave, Hadja Lahbib, tha se partnerët e financuar nga BE-ja tashmë po ofrojnë ndihmë në terren. Ajo u shprehu ngushëllime viktimave të tërmetit.

Franca dërgoi menjëherë një ekip prej 85 operatorësh të specializuar të kërkim-shpëtimit. Presidenti francez Emmanuel Macron tha se zhvilloi një telefonatë me presidenten në detyrë të Venezuelës, Delcy Rodriguez, në të cilën shprehu solidaritet dhe përgatiti ndihmën franceze.

Ministria e Jashtme e Spanjës tha më herët këtë mëngjes se i kishte ofruar Venezuelës ndihmë emergjente përmes Njësisë së Emergjencave Ushtarake dhe agjencisë së saj të zhvillimit.

Ministria e Mbrojtjes e Gjermanisë tha se mund të vërë në dispozicion gjashtë avionë transporti A400M për mbështetje emergjente, për t'i lejuar vendit të "transportojë personel dhe pajisje" në Venezuelë, si dhe për të lehtësuar fluturimet e transportit brenda Venezuelës.

Kryeministrja italiane Giorgia Meloni shprehu solidaritet me autoritetet dhe popullin e Venezuelës, duke thënë se Italia po punon për të aktivizuar menjëherë çdo kanal ndihme humanitare.

Presidentja e Komisionit Evropian, Ursula von der Leyen, reagoi përmes një postimi ku shkruante: “Shprehim solidaritetin tonë me të gjithë venezuelianët pas tërmeteve shkatërruese të natës së kaluar. Po mendoj veçanërisht për viktimat dhe familjet e tyre.” /CNA





Lajmet e fundit nga