E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Mazhoranca në krizë numrash në Kuvend

29 Tetor 2016, 10:08, Aktualitet CNA

Mazhoranca qeverisëse ndodhet në krizë numrash në Parlament. Përplasjet brenda PS, por dhe tensionet në koalicionin me PDIU dhe LSI kanë bërë që mazhoranca të humbasë shumë vota. Prej kohësh ajo e ka humbur shumicën e cilësuar në sallën e Kuvendit, teksa në vështirësi të shumta ndodhet Partia Socialiste.

Kjo parti nga zgjedhjet e 2013 doli me 64 deputetë, mirëpo tani ka përfunduar në 60, ndërsa nga këta, 5 vota nuk i ka fare të sigurta. Kjo do të thotë se PS ka vetëm 55 deputetë besnikë në sallë dhe kjo ka bërë që të jetë në dorë të aleatëve të saj. “Sot” shkruan se pak kohë më parë Rama tentoi të afronte PDIU dhe ta mbante si kamardare shpëtimi në rast ndarje me LSI, por tani as PDIU nuk bën dot punë me 5 deputetët e saj, pasi arritja e 71 votave është shumë e vështirë.

Seancat e fundit parlamentare kanë dëshmuar qartë krizën e numrave. Përveç miratimit të ligjeve të reformës, në asnjë seancë tjetër nuk është arritur shumica e cilësuar. Dy javë më parë mazhoranca përfundoi në 70 vota, ndërsa dje kishte vetëm 79.

Rrënohet PS

Partia Socialiste është forca më e goditur sa i takon ikjes së deputetëve. Në 2013 kjo parti mori 64 deputetë, mirëpo shumë prej tyre janë larguar një e nga një. 5 deputetë aktualisht ndodhen jashtë grupit parlamentar. I pari ishte Tom Doshi. Pas akuzave të tij se Ilir Meta donte ta eliminonte, Rama e përjashtoi nga partia. Një tjetër emër është Armando Prenga, i cili po ashtu u përjashtua pas sherrit me armë ku pati dhe të plagosur. Ndërsa Arben Ndoka u dorëhoq dhe vendin e tij e zuri Mirela Ferracaku, por kjo zgjodhi të dilte si deputetët e pavarur. Ndërkohë ditët e fundit u larguan deputetët e Mimoza Hafizi dhe Ben Blushi. Ndërkohë një tjetër deputet që ka deklaruar largimin është Vladimir Kosta, i cili nuk është larguar ende zyrtarisht. Pra nga 64 vota në sallë, PS ka humbur 5 deputetë. Por edhe pse PS zyrtarisht figuron me 60 deputetë, ka shumë vota të pasigurta. Dy deputetë të tjerë janë Eduart Ndocaj dhe Mira Shehu. Ndocaj ka kritikuar shpesh herë qeverinë dhe nuk e jep votën e tij në sallë. E njëjta gjë ndodh dhe me deputeten Mira Shehu, e cila njihet si e afërt me Koço Kokëdhimën. Por Rama nuk ka të sigurta as vota e dy deputetëve të vjetër, si Arta Dade dhe Namik Dokle. Aktualisht zyrtarisht PS sipas të dhënave të Kuvendit ka 60 deputetë, mirëpo nëse hiqen vota e Dades, Dokles, Ndocajt, Shehut dhe Kostës, PS ka vetëm 55 vota të sigurta në sallë.