E fundit!

11:38 Aktualitet

Rrëshqitje dheu në Kodër Currila/ Rrezikohet pallati

Rrëshqitje dheu janë regjistruar në Kodër Currila në orët ...

Saimir Tahiri pas përgjimeve të gjyqtarëve dhe prokurorëve?!

28 Tetor 2016, 09:29, Aktualitet CNA

Kohët e fundit mediat po raportojnë dhe denoncojnë gjykatës, prokurorë, avokatë të përfshirë në skandale seksuale dhe korruptive.

Pak javë më parë një prokuror i Tiranës, megjithëse nuk shfaqej aspak në filmime, u akuzua për korrupsion. Më pas një tjetër prokuror, në një qytet periferik, u denoncua nga një qytetar, i cili më pas u bë palë me prokurorin.

Mbrëmë një audio-përgjim, i cili ishte dëgjuar prej shumë kohësh në zyrat e shtetit shqiptar, u dha publikisht në emisionin ?Stop?. Në vetvete një skandal që tregonte epshet e një gjyqtari, i cili me pushtetin e tij dhe tejkalimin e autoritetit që i jep ligji, kërkonte favore seksuale për të zgjidhur një çështje gjyqësore.

Rastet e gjykatësve dhe prokurorëve në media, si ai i Tiranës dhe ky i Gjirokastrës, së fundmi janë të shpeshta dhe jo pa dyshime, jo pa shumë pikëpyetje të cilat flasin për një servirje të mundshme të këtyre materialeve në media nga ata që sot kanë nisur një betejë të hapur me sistemin e drejtësisë.

Në rastin e Tiranës prokurori nuk ishte aspak në video, nuk kishte asnjë dokument apo fakt se ai ishte përfshirë në aferën korruptive, por gjatë gjithë denoncimit në media shigjetat u drejtuan te prokrori dhe jo te oficeri gjyqësor që shfaqej duke marrë para. Dhe kjo ngriti mjaft pikëpyetje, sidomos pas daljes publike të drejtuesve të emisionit, të cilët ishin të pasaktë në disa prej detajeve të dhëna të cilat nuk përputheshin me ngjarjen.

E njëjta situatë ishte edhe dje me kryetarin e Gjykatës në Gjirokastër. Audioja e përgjimit kishte qarkulluar prej shumë kohësh dhe më në fund u nxit dhe u servir nga një studio televizive ku qartazi përtej skandalit të kryetarit qëndronte afera dhe shantazhi i një qytetareje që shkonte dhe kërkonte favore për një vendim gjyqësor.

Në asnjë nga rastet nuk duam të mbrojmë të korruptuarit e drejtësisë apo të korruptuarit e përdorur nga segmente të caktuara të shtetit dhe qeverisë në veçanti, të cilat në kuadër të një beteje politike me drejtësinë po përdorin instrumenta si sigurimi I shtetit në kohën e diktaturës. Flet-rrufe dhe më pas pranga.

Këto veprime, të cilat ngrenë mjaft dyshime se urdhërohen nga zyra e kryeministrit Rama dhe zbatohen nga ministri brendshëm Tahiri fatkeqësisht po i humbasin moralin dhe vlerën betejës me drejtësinë e korruptuar. Politika, e cila është po aq peng i korrpsionit sa edhe drejtësia po përdor insitutcionet për të sulmuar elementë të caktuar të drejtësisë që të ketë një frymë sa më të fortë Pro reformës në drejtësi dhe të nxisë zbatimin e saj sipas interesave të qarqeve të caktuara dhe grupeve të interesit pranë kreut të qeverisë.

Nuk janë të rastësishme daljet e videove sa herë humbet vemëndja nga reforma apo diskutohet Vettingu. Qeveria po përdor filmime, regjistrime të paligjshme, të cilat i publikon në media dhe duke shfrytëzuar detyrën e saj i kthen në vegla që nxisin dhe sjellin përfitim për pushtetin politik, i cili kërkon ?të pastrojë? drejtësinë nga llumi ku është zhytur, por vetë kjo politikë është më e ndotur dhe më e zhytur se vetë drejtësia.

Ndoshta ky është rasti ku vërtetohet thënia se i mbyturi të mbyt. /Citynews