Taulant Balla kreu detyrën që i kishte dhënë Rama/ Edhe në 2017-ën në koalicion me PD-në

25 Tetor 2016, 10:04, Aktualitet CNA

Dy ditë pas ftesës publike që kryeministri dhe kreu i PS-së Edi Rama i bëri nëpërmjet nënkryetarit të Grupit Parlamentar Taulant Balla për t’iu bashkuar koalicionit të majtë, kryetari i PAA-së Agron Duka, në një intervistë për ?Koha Jonë?, ka komentuar këtë ftesë, si dhe të ardhmen me Partinë Demokratike me të cilën aktualisht është në aleancë.

Sipas Dukës, Taulant Balla kreu detyrën që i kishte dhënë udhëheqësi i tij Edi Rama, i cili për të forcuar aleancën e vet për zgjedhjet parlamentare të 2017-ës kërkon aleanca të reja.

Si i komentoni ftesat e bashkëpunimit që ju bënë dy forcat e mëdha, Partia Socialiste dhe ajo Demokratike në Konventën e PAA-së?

I shikoj si normale. Ne si forcë politike jemi një parti e qendrës dhe ftesën e zotit Basha e shikoj fare të arsyeshme, pasi ne jemi në aleancë me kampin e djathtë, kështu që normalisht kreu i PD-së kërkon vazhdimin e bashkëpunimit, si dhe ne kemi kandidaturën tonë të përbashkët edhe në Kolonjë, ku do të zhvillohen zgjedhjet e pjesshme për këtë bashki. Ndërsa, Balla kreu detyrën që i kishte dhënë udhëheqësi i tij, që në fund të fundit kjo parti ka dhe një të kaluar me të majtën, kështu që për të forcuar aleancën e vet për zgjedhjet parlamentare të 2017-ës kërkon aleanca të reja.

A mund ta cilësojmë si provokim ftesën e bërë nga zyrtari i Partisë Socialiste, i cili bën thirrje për shkëputje nga koalicioni i djathtë, pikërisht në një aktivitet të këtij koalicioni, siç ishte Konventa e PAA-së që u mbajt të shtunën?

Kjo varet nga këndvështrimi që çdokush dëshiron ta shikojë këtë. Por unë nuk e shikoj si negativ. Sigurisht ai e bëri për leverdinë e tij në radhë të parë, por nuk është se e kam vrarë mendjen shumë se ç?donte të thoshte me mesazhin e tij zoti Balla. Pasi çfarë do të provokonte?! Në fund të fundit ai atë detyrë ka dhe çdokush përpiqet që të forcojë aleancat e veta dhe ta çojë uji në mulli të vet. Por ne jemi aty ku kemi qenë dhe këtë e tregojmë edhe me zgjedhjet në Kolonjë.

Do vazhdoni të jeni pjesë e së djathtës edhe në zgjedhjet e ardhshme parlamentare të 2017-ës?

Normalisht që po. Pa asnjë diskutim.

Si po shkojnë përgatitjet për garën e Kolonjës?

Deri tani shumë mirë. Sot (dje) në orën 17:00 do të zhvillojmë një mbledhje të posaçme, ku pritet të ngremë dhe shtabin drejtues të fushatës tonë në Kolonjë, pasi siç e dini, deri të dielën ishin të angazhuar me punimet e Konventës Kombëtare. I kemi çuar atje tre zyrtarë të lartë nga Kryesia e PAA-së, të cilëve u është bashkuar edhe vetë kandidati ynë për kryebashkiak të Kolonjës atje dhe me fillimin e javës së ardhshme do të zbresim dhe ne në terren, ku do të jemi prezent gjatë gjithë kohës në Kolonjë. /Citynews