Cerar: Sa më parë të caktohet data për negociatat e Shqipërisë me BE-në

6 Shtator 2016, 07:36, Aktualitet CNA

Kryeministri Edi Rama gjatë një vizitë zyrtare në Slloveni ka marrë mbështetje të plotë për caktimin e datës së negociatave me BE-në, nga kryeministri slloven Miro Cerar, gjatë takimit që dy homologët patën në Pallatin Presidencial në Lubjanë.

Kryeministri Edi Rama kërkoi që Sllovenia të bëhet avokat i çështje së integrimit të Shqipërisë në BE, për hapjen e negociatave për Shqipërinë.

?Ne presim që Sllovenia të jetë ndër avokatët më të zëshëm të dhënies të rekomandimit për çeljen e negociatave. Besoj që nuk do të jetë një punë shumë e vështirë, pasi jam i bindur që edhe të tjerë do të mbështesin fort Shqipërinë në këtë moment kyç, kur çelja e negociatave nuk përbën një mbërritje, por përbën vetëm një stacion tjetër të rëndësishëm për të shkuar më tutje në një proces, që siç tregon edhe shembulli i shkëlqyer i Sllovenisë, është një proces i gjatë, i vështirë, por i domosdoshëm?, tha kryeministri Edi Rama.

Nga ana e tij kryeministri slloven Miro Cerar vlerësoi ecjen e madhe të Shqipërisë përpara dhe u zotua në mbështetje të plotë të Shqipërisë në caktimin e datës së negociatave.

?Mirënjohje të madhe kolegut Rama për një ecje të madhe të Shqipërisë, vitet e fundit, drejt Bashkimit Europian, ku edhe Sllovenia aktivisht mbështet që sa më parë të caktohet data për negociatat për afrimin e Shqipërisë në Bashkimin Europian. Sa i përket reformës në drejtësi, për të cilën më duhet të uroj qeverinë, mund të them se bëhet fjalë për një hap shumë të rëndësishëm përpara në drejtimin e Shqipërisë drejt Bashkimit Europian. Sllovenia është e gatshme dhe për këtë kemi biseduar edhe sot, që të ofrojmë një bashkëpunim dhe ndihmë, nëse është e dobishme dhe e favorshme për Shqipërinë?, theksoi kryeministri slloven Cerar.

Kryeministri Rama falenderoi kryeministrin slloven për mbështetjen në këtë drejtim, ndërsa u shpreh: ?Besoj që ajo çka Kryeministri tha lidhur me progresin e qenësishëm që ne kemi bërë për të çelur më në fund negociatat me Bashkimin Europian është një opinion i konsoliduar jo vetëm i Kryeministrit slloven dhe i qeverisë së tij, por gjerësisht mes anëtarëve të Bashkimit Europian. E falenderoj edhe një herë Kryeministrin, edhe publikisht, për gatishmërinë e tij dhe të ekipit të tij për të na ndihmuar me eksperiencën e tyre nga procesi i integrimit dhe me ekspertizën e tyre shumë të vyer në çdo aspekt të tij?,

Lidhur me marrëdhëniet ekonomike dy kryeministrat ndanë bashkë qëndrimin për forcimin e marrëdhënieve në këtë drejtim. /Citynews.al