Rama në Slloveni: Mos-liberalizimi i vizave për Kosovën, turp për BE-në

6 Shtator 2016, 07:11, Aktualitet CNA

Kryeministri i Shqipërisë, Edi Rama, gjatë një vizite zyrtare në Slloveni u prit në Lubjanë nga kryeministri slloven Miro Cerar. Pas takimit kokë më kokë dhe më pas mes delegacioneve respektive Rama dhe Cerar vlerësuan marrëdhëniet shumë të mira mes vendeve dhe shprehën vullnetin e përbashkët për zgjerimin dhe thellimin e tyre në fusha me interes të ndërsjellë.

Ndër çështjet e diskutuara për zhvillimet në rajon, lidhur me Kosovën Kryeministri Rama e quajti turp për BE, mosliberalizimin e vizave për Kosovën deri tani.

?Fakti që ka vetëm një popull, i cili nuk lëviz dot lirisht si të gjithë të tjerët në Evropë, – për shkak se duhet të lëvizë me vizë në çdo vend, dhe ky është populli i çliruar i Kosovës, – është një turp për BE?, tha kryeministri i Shqipërisë Edi Rama.

Ai theksoi se qeveria e Shqipërisë ka mbështetur dhe mbështet fuqimisht dialogun mes Kosovës dhe Serbisë, ndërsa shprehu bindjen se njohja sa më e shpejte e Kosovës nga Serbia, do të jetë në dobi të vetë Serbisë, si dhe do të lehtësojë proceset bashkëpunuese.

?Ashtu sikundër, nga ana tjetër, ne e kemi mbështetur dhe e mbështesim fuqimisht dialogun mes Serbisë dhe Kosovës, përtej faktit se mbrojmë fort mendimin që sa më shpejt Serbia të njohë Kosovën, aq më shpejt vetë Serbia do të çlirohet nga një situatë psikologjikisht dhe strategjikisht e pafavorshme për të, në raport me Kosovën dhe aq më të lehta do të bëhen të gjitha proceset e tjera. Nuk është se Kosova nuk respekton marrëveshjet me Bashkimin Europian. E kundërta është e vërtetë. Të gjitha palët në Kosovë janë të përkushtuara në procesin e integrimit europian?, u shpreh më tej kreu i ekzekutivit shqiptar.

Rama vlerësoi gjithashtu edhe përpjekjet për futjen e Kosovës në NATO.

?Për sa i përket Kosovës, së pari dëshiroj të nënvizoj se e kam ndarë edhe me Kryeministrin slloven domosdoshmërinë që së bashku, ne të bëjmë përpjekje për të institucionalizuar marrëdhëniet e Kosovës me NATO-n. Ka qenë një hap jashtëzakonisht i rëndësishëm strategjik, anëtarësimi i Malit të Zi në NATO dhe është po kaq e rëndësishme strategjikisht që edhe Kosova të institucionalizojë marrëdhëniet me NATO-n dhe të hyjë në një proces normal drejt integrimit të plotë në NATO?, ka thënë mes tjerash Rama. /Citynews.al