Buxheti i bashkisë 13 miliardë lekë më shumë, të ardhura në 2018/ Veliaj rrit taksat

4 Shtator 2016, 09:44, Aktualitet CNA

Të ardhurat e bashkisë së Tiranës parashikohen të rriten me 13 miliardë lekë për 2 vjet. Programi Buxhetor Afatmesëm i Bashkisë së Tiranës për vitet 2016-2018, tregon se të ardhurat e këtij institucioni do të rriten nga 2016-2018, pra për 2 vite, me 13 miliardë lekë. Ky buxheti parashikon investime në projekte të mëdha si Zgjatimi i Bulevardit të Tiranës, Unaza e Madhe, Pazari i Ri, Parku Zoologjik dhe Terminali i Autobusëve.

Sipas Gaetës Sot parashikimi i të ardhurave për Bashkinë e Tiranës është mbështetur kryesisht në llogaritjet e kapacitetit të taksave e tarifave, informacion i përfituar nga programi i taksave vendore, në ecurinë e realizimit të tyre në vite si dhe politikat e përcaktuara për periudhën në vijim, duke u mbështetur në aktet ligjore për to. Si rrjedhim i reformës territoriale dhe të ardhurave të trashëguara nga njësitë vendore të shkrira si dhe ndryshimeve ligjore për taksat vendore, të ardhurat e Bashkisë së Tiranës për vitin 2016, paraqiten me një rritje të ndjeshme në krahasim me periudhat e mëparshme prej 24%, ndërsa për vitet 2017 e 2018 mendohet të kenë rritje përkatësisht me 5% më shumë se viti respektiv i mëparshëm. Parashikimi i të ardhurave për këtë periudhë afatmesme reflekton dhe ndryshimet në paketën fiskale si dhe parashikon rritjen e nivelit të të ardhurave nga taksat e tarifat vendore duke forcuar kapacitetet administruese dhe duke rritur numrin e taksapaguesve. Kështu, nëse për vitin 2016, bashkia ka parashikuar në total 12,355,386,969 lekë të ardhura, për vitin 2017 ka parashikuar 12,957,088,148 lekë, ndërsa për vitin 2018 totali shkon deri në 13,616,229,911 lekë. Nëse flasim për ecurinë e disa prej taksave dhe tarifave të bashkisë, vërejmë se një pjesë e mirë e tyre do të sjellin shumë më shumë të ardhura në arkën e këtij institucioni gjatë 2 viteve të ardhshme. Mjafton të përmendim këtu Taksën mbi tokën Bujqësore, e cila për vitin 2016 do të sjellë 34,000,000 lekë, për vitin 2017 parashikohet të sjellë 35,000,000 lekë, ndërsa për vitin 2018 parashikohet në shumën 36,000,000 lekë. /Citynews.al