SPAK hetim 3 mld eurove të vjedhura nga politikanët, gjurmim 1.5 mld dollarëve të fshehura jashtë vendit

21 Gusht 2016, 08:43, Aktualitet CNA

Janë mbi 3 miliardë euro para korrupsioni të përfituara nga zyrtarët shqiptarë përmes aferave dhe abuzimeve me pushtetin. Në ligjin e ri për Strukturën Speciale Antikorrupsion (SPAK) dhe atë të antimafias, theksohet se do hetohen të gjithë zyrtarët mbi të cilët ka indicie për korrupsion dhe atyre do u sekuestrohen pasuritë.

Sipas Gazetës Sot janë vjedhur gjatë 4 viteve të fundit mbi 1 miliard euro vetëm me tenderat dhe abuzimet me pushtetin. Është vetë KLSH e cila në raportin për 2015 e bën publike këtë shifër. Për të gjithë këta persona që kanë abuzuar me tenderat, Kontrolli i Lartë i Shtetit ka bërë kallëzim penal në prokurori dhe bëhet fjalë për rreth 400 persona. Pikërisht këta individë kanë vjedhur mbi 1 miliard lekë nga taksapaguesit shqiptarë, para që pritet t?u merren, duke u sekuestruar pronat dhe gjithçka tjetër. Dosjet e tyre janë në prokurori dhe me ngritjen e SPAK pritet të rihapen, ku nëse vërehet se kanë kryer shkelje atëherë do vuajnë pasojat e tjera, përveç dënimit.

Prokuroria e Posaçme Antikorrupsion, që do të ngrihet në kuadër të reformës në drejtësi, do të ketë një zyrë vetëm për bashkëpunimin me ndërkombëtarët, me qëllim gjetjen e parave të pista. Ajo do ndjekë modelin e Kroacisë, ku falë bashkëpunimit me FBI, DEA apo Interpol do gjurmohen llogaritë bankare të gjithë personave të dyshuar. Por sa është vlera e parave të fshehura jashtë vendit, të paktën zyrtarisht? Sipas një raporti të ?Global Financial Integrity? nga Shqipëria vitet e fundit kanë dalë rreth 1.5 miliardë dollarë, para të vëna nga korrupsioni, krimi dhe droga. Bëhet fjalë për një shifër vërtet të lartë dhe shumica e parave kanë përfunduar kryesisht në Qipro, Zvicër, Maltë, apo dhe ishujt Kajman. Të dhënat bazohen edhe mbi raportet e Drejtorisë së Parandalimit të Pastrimit të Parave dhe raporteve ndërkombëtare.

Në prokurori janë dosjet për dhjetra zyrtarë, që akuzohen se kanë fshehur pasurinë me vlera gjigante. Gazeta ka bërë një bilanc të të gjithë kallëzimeve që ka bërë Inspektorati i Lartë i Deklarimit dhe Kontrollit të Pasurive, ku rezulton se gjatë 2 viteve të fundit ka pasur akuza për disa persona, por vetëm 10 prej tyre kanë fshehur rreth 12 milionë euro. 1 miliard euro janë vjedhur me tenderat, 1.5 miliardë dollarë kanë dalë jashtë vendit dhe mbi 12 milionë euro janë fshehur, në total i bie rreth 3 miliardë euro, duke futur dhe vitet e mëparshme. Këto para janë të vëna nga korrupsioni dhe puna e pandershme. /Citynews.al