E fundit!

09:24 Kronika

Pjesë e grupeve kriminale/ Pritet ekstradimi i 6 personave të kapur në Dubai

Pritet të ekstradohen sot, në Shqipëri, 6 shtetasit e kapu...

Qeveria teknike/ 3 skenarët që mund të përdorë PD për “kushtin e patjetërsueshëm”

21 Gusht 2016, 09:01, Aktualitet CNA

Nga Gjergji Koja

Kryetari i Partisë Demokratike, Lulzim Basha, do të deklaronte para pak javësh se Qeveria teknike është një kusht i patjetërsueshëm për zgjedhje të lira dhe të ndershme.

Deklarata e kreut të PD u bë në një moment që edhe Kryeparlamentari Ilir Meta, si drejtues i LSI-së, artikuloi mundësinë e krijimit të një qeverie teknike.

Tashmë Meta ka ndryshuar mendje, ndërsa kushti i patjetërsueshëm i PD-së ka mbetur në fuqi.

Por si mund ta realizojë PD rrëzimin e Qeverisë Rama, kur mandatet e saj në Kuvend nuk mjaftojnë edhe nëse paraqet një mocion mosbesimi?

Fillimisht PD duhet të qartësojë se çfarë mendon me qeveri teknike, pra synon që të jetë një qeveri me bazë të gjerë sikundër ato të 1991 apo 1997, apo një qeveri me teknicienë që do të kenë vetëm një mision, garantimin e zgjedhjeve.

Pasi të qartësojë këtë ide, PD mund të vërë në funksion disa nga skenarët të cilët mund të çojnë në krijimin e një Qeverie teknike.

Skenari i parë është që opozita të organizojë protestat, të cilat duhet të ketë një qëllim të qartë, duhet të jenë masive dhe paqësore. Për këtë PD duhet të ketë një aleancë vetëm me qytetarët, duke mos pranuar zgjidhje të momentit të fundit, sikundër përflitet se garancinë për zgjedhje të lira dhe të ndershme, mund t?a japë një nga aleatët e sotshëm të Edi Ramës, qoftë duke pasur edhe postin e ministrit të Brendshëm.

Modeli i protestave të organizuara deri më tani nga opozita nuk janë të mjaftueshme për të rrëzuar qeverinë Rama-Meta, çka do të thotë se pavarësisht pjesëmarrjes një tubim që zgjat jo më shumë se 60 minuta nuk mund të sjellë asnjë rezultat. Opozita e drejtuar nga PD duhet të organizohet për mbajtjen e një proteste, e cila do të përfundojë atëherë kur Kryeministri të japë dorëheqjen, pra një tubim që përveç se duhet të jetë me një pjesëmarrje të lartë, duhet që njerëzit t?a kenë të qartë që ajo do të zgjasë jo me orë por me ditë.

Ndoshta jo duke vendosur çadrat në bulevardin ?Dëshmorët e Kombit?, sikundër veproi Edi Rama me hapjen e kutive, por duke rezistuar sa më gjatë, qoftë edhe të ulur para godinës së Qeverisë.

Për këtë duhet vendosmëri, besueshmëri dhe angazhim të opozitës se do të kujdeset për të mbarvajtur protestat dhe për të shmangur çdo provokim që mund të cënojë qëllimin e saj.

Skenari i dytë është ai i djegies të mandateve në Kuvend, për të cilën opozita duhet të bindë deputetët e saj që të ndërmarrin një veprim të tillë, deri në largimin e Qeverisë Rama-Meta dhe krijimin e një qeverie teknike që do të përgatisë zgjedhjet.

Opsioni i djegies të mandateve të deputetëve është hedhur fillimisht nga Berisha, kur në Parlament dikustohej ligji për dekriminalizimin, ndërsa më pas është përsëritur nga Basha, kur ekzistonte mundësia që deputetë të opozitës të votonin draftin e reformës në drejtësi, nëse nuk kishte konsensus.

Për këtë, PD duhet të jetë bindëse jo vetëm me deputetët e saj në Grupin Parlamentar, por edhe me partitë aleate, në mënyrë që vendimi të jetë unanim dhe mos krijohen opozita të emëruara.

Skenari i tretë, mund të jetë paralajmërimi që PD të mos bëhet pjesë e një procesi zgjedhor që mund të administrohet nga Qeveria Rama-Meta.

Për këtë PD duhet të nisë bindjen në rradhë të parë të ndërkombëtarëve se kjo Qeveri nuk garanton zgjedhje të lira dhe opozita nuk ka asnjë garanci që vota nuk do të tjetërsohet. PD duhet të jetë e prerë në qëndrimin e saj, nëse realisht shqetësimi i saj ka të bëjë me zgjedhjet e lira dhe jo të veprojë sikundër bëri me ndarjen e re territoriale apo reformën në drejtësi, kur me muaj me rradhë bojkotoi proceset dhe më pas pranoi produktin e servirur, pavarësisht disa modifikimeve që iu bënë drafteve, në rastin e reformës në drejtësi.

Argumentet se standardet zgjedhore mund të cënohen ekzistojnë, thjesht opozita duhet të tregohet bindëse, jo me ambasadorët e akredituar në Tiranë, por me kancelaritë e vendeve të BE, Brukselin dhe SHBA. PD duhet ta artikulojë qartësisht se nuk do të njohë rezultatin e zgjedhjeve dhe deputetët e saj nuk do të marrin mandatet e deputetëve në asnjë rast, nëse procesi administrohet nga kjo qeveri.

Tashmë duhet pritur vjeshta, nëse PD dhe Basha vërtet kanë si kusht të patjetërsueshëm rrëzimin e Qeverisë Rama-Meta dhe krijimin e një qeverie teknike, e cila duhet të administrojë procesin zgjedhor.

Ky moment mund të jetë një gur prove jo vetëm për vendosmërinë e opozitës, por edhe për aleatët e Ramës në Qeverisje, të cilët herë shfaqen si njerëz të konsensusit dhe herë pëlqejnë t?i trajtojnë si shpëtimtarë në situata ngërçi apo të tensionuara. /citynews/