E fundit!

11:38 Aktualitet

Rrëshqitje dheu në Kodër Currila/ Rrezikohet pallati

Rrëshqitje dheu janë regjistruar në Kodër Currila në orët ...

A do ta hetojë Byroja Kombëtare e Hetimit vjedhjen e floririt në Krrabë?

9 Gusht 2016, 17:10, Aktualitet CNA

Megjithëse kanë kaluar shumë vite nga vjedhja e thesareve të Krrabës ku depozitohej thesari i shtetit, askush në nivelin politik nuk ka mbajtur përgjegjësi për atë ngjarje. Madje kurrë nuk pati një bilanc të saktë sesa flori u zhduk nga tunelet e Krrabës, megjithëse përbën një nga vjedhjet më të mëdha të ndodhura në këtë vend.

Prokuroria në atë kohë ngriti akuzën për disa banorë të zonës që kishin vjedhur floririn nga tunelet e sigurisë së lartë, por vështirë se kjo u besua dhe besohet. Madje hetimet nuk arritën të vërtetojnë nëse floriri vërtet u vodh në tunelet e Krrabës apo u zhduk gjatë transportit të tij drejt Krrabës.

Por edhe nëse këta banorë ishin hajdutët e tuneleve të Krrabës, në nivelin e politik askush nuk u dënua, as u hetua. Akuzat publike që u bënë në atë kohë nga opozita e drejtuar nga PD, më konkretisht Sali Berisha që mbante postin e Kreut të PD-së, i drejtoheshin Ilir Metës që mbante detyrën e Kryeministrit. Akuzat në atë kohë u konsideruan politike, madje ndoshta edhe sot protagonistët e asaj kohe, qofshin të akuzuar, qofshin akuzuesit, mund të thonë se ishin akuza politike që u bënë për shkak të një situate të caktuar politike. Por ajo që është fakt, është se askush nuk mbajti përgjegjësi, në të gjithë piramidën shtetërore, mbi vjedhjen e thesarit.

Tashmë që reforma në drejtësi është drejt përfundimit dhe pritet të zbatohet, nuk dihet nëse do të mund të prekë këtë çështje, që megjithëse kan kaluar vite, vijon të mbetet në mendjen e qytetarëve.

Nëse sot qytetarët presin drejtësi nga kjo reformë, nëse kjo reformë synon të kalojë në sitë lidhjet politike apo të çdo funksionari, nëse kjo reformë synon realisht të zbardhë atë çka ka ndodhur në këto 25 vite, apo sesi jan vendosur pasuritë e zyrtarëve të çdo niveli, atëherë kjo çështje dhe shumë të tjera të ngjashme me të, mund të jenë objekt i punës së Byrosë Kombëtare të Hetimit.

Në të kundërt shpresat, pavarësisht pritshmërive, nuk do të ketë ndonjë dallim të madh mes asaj që ka ndodhur deri më tani me drejtësinë aktuale dhe asaj që mund të ndodhë nesër, pasi të kemi institucionet e reja të drejtësisë.

Ndoshta zbardhja e këtyre vjedhjeve me përmasa të mëdha do të jenë guri i provës për drejtësinë e re shqiptare dhe institucionet e reja të drejtësisë. /citynews/