E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Situata në Maqedoni/Rama-Meta shprehin solidaritet: Gati të ndihmojmë me çdo gjë që mundemi

7 Gusht 2016, 16:56, Aktualitet CNA

Kryeministri Edi Rama dhe Kreu i Kuvendit Ilir Meta shprehën solidaritet me autoritetet maqedonase për përballimin e situatës së përmbytjeve të krijuar në vendin fqinj, si pasojë e motit të keq, ku humbën jetën 22 persona, por bilanci i humbjeve njerëzore mund të thellohet edhe më shumë.

Rama përmes një postimi në rrjetet sociale është shprehur se po ndjek me shqetësim e dhimbje zhvillimet tragjike në Maqedoni dhe se është gati të ndihmojë me gjithçka që mundet.

“Ndjekim me dhimbje e shqetësim zhvillimet tragjike ne Maqedoni! Gati për çdo gjë mundemi për të ndihmuar vëllezërit, motrat dhe fqinjët tanë”, ka shkruar Rama.

Ndërsa, Kryeparlamentari Ilir Meta ka shprehur ngushëllimet e tij për jetët e humbura nga përmbytjet në Maqedoni.

?Me shqetësim të madh, trishtim të thellë dhe solidaritet të plotë kam ndjekur situatën e pazakontë të krijuar nga reshjet e shiut në Maqedoni dhe veçanërisht në Shkup e Tetovë. Në këto momente dramatike unë bashkoj dhembjen time me të gjithë familjarët e viktimave dhe lutjet e sinqerta për të ndalur me kaq ky bilanc tragjik humbjesh. Ngushëllimet më të thella për ta dhe solidaritet me gjithë të prekurit nga kjo fatkeqësi e tmerrshme natyrore. Në emër të Kuvendit iu përcjell banorëve të zonave dhe autoriteteve zyrtare të Maqedonisë, Shkupit dhe të Tetovës solidaritetin tonë më të thellë. Ne nxisim, mbështesim dhe përshëndesim çdo iniciativë të qeverisë shqiptare për t?u gjendur pranë, sipas mundësive tona, qytetarëve të Maqedonisë dhe autoriteteve të Shkupit dhe të Tetovës. Kam besim se banorët e prekur nga kjo fatkeqësi natyre, autoritetet zyrtare të fqinjit tonë , por edhe partnerët evropianë të Maqedonisë dhe sidomos fqinjët e tij, do të jenë në një front e në një aksion të përbashkët për të përballuar tërbimin e natyrës dhe për të minimizuar dëmet”, është shprehur Meta.

Nga përmbytjet në Shkup kanë mbetur deri tani 22 viktima sipas Ministrisë së Brendshme, ndërsa bilanci mund të shkojmë mbi 30,pasi disa janë shpallur të humbur nga mbrëmja e djeshme.

Ndërsa numri i personave që janë zhvendosur është afro 1 mijë, ndërsa operacioni i kërkimit vazhdon.

Qeveria maqedonase ka shpallur gjendjen e jashtëzakonshme për 15 ditë, ndërsa nesër e ka shpallur ditë zie kombëtare në nderim të 22 viktimave që kanë humbur jetën.

Kryesisht lagjet e banuara nga shqiptarët në Shkup si Hasanbeg, Haraçinë dhe Çair janë përmbytur tërësisht.

Gjithashtu, një tjetër fakt që ka ndikuar në përmbytjen e këtyre lagjeve është edhe mungesa e investimeve nga qeveria maqedonase prej më shumë se 20 vitesh. /citynews/