SHBA: mbështetësit luajalë distancohen nga Trump

6 Gusht 2016, 08:13, Aktualitet CNA

Ai nënçmon, polarizon, ka shumë që u vjen turp prej tij: kandidati për president Donald Trump ka lënë pas ditë të turbullta. Numri i kritikëve rritet – edhe tek republikanët. Ata kanë dyshime ndaj kandidatit të tyre.

Politikanët drejtues pak luajalë

Së fundi madje nënkryetari i partisë Mike Pence u distancua nga Trump-i, e ky ishte madje kandidati i dëshiruar prej Trump-it për postin e zëvendëspresidentit. Megjithatë Pence në televizionin Fox News iu bashkua kryetarit të parlamentit Paul Ryan, i cili ia kish refuzuar mbështetejen Trump-it për fushatën e tij elektorale në Visconsin. Me Ryan-in atë e lidh një “miqësi shumëvjeçare” dhe ai e mbështet fushatën e tij për t’u rifutur në Kongres, tha Pence në Fox News.

Trump më parë me distancimin e tij provokues prej Ryan, që konsiderohet ndër republikanët më me influencë në Uashington, e sfidoi kryesinë e partisë. Qysh nga ai çast në parti në kanënisur përplasjet. Kryetari i partisë Reince Priebus deklaroi, se është “jashtëzakonisht i indinjuar” me qendrimin e pashembullt të Trump-it ndaj Ryan. Në Uashington veprimi i Trump-it vlerësohet si revansh, pasi Ryan disa herë ishte shprehur me kritika ndaj Trump-it.

Qysh në fillim Trump nuk arriti t’i mbledhë rreth vetes të gjithë përkrahësit e partisë. Por ndërkohë situata ka arritur një përshkallëzim të ri, tha eksperti politik për SHBA-në Scott Reed për “Washington Post”. Ka ardhur koha për një fillim të ri, sipas tij.

Grindje të brendshme në vend të përqendrimit ndaj demokratëve

Edhe republikani me influencë dhe shoku besnik i Trump-it Newt Gingrich, i bëri thirrje kandidatit, që ta ndryshojë qendrimin e tij. “Ai ende nuk ia ka dalë të kalojë fazën për t’u bërë presidenti i mundshëm i SHBA-së”, i tha Gingrich televizionit Fox Business Network. “Deklaratat e tij të javëve të fundit nuk janë ogur i mirë për fushatën e tij.” Gingrich e akuzoi Trump-in, se me provokimet e pamatura po i shtyn zgjedhësit drejt kandidates demokrate për presidente Hillary Clinton: “Trump i ndihmon asaj, të fitojë zgjedhësit, sepse ai është më i papranueshëm se ajo.”

Gjatë ditëve të shkuara sulmet e Trump-it ndaj prindërve myslimanë të një ushtari të rënë në Irak, shkaktuan një valë të re indinjate. Me këtë Trump sipas mendimit të shumë republikanëve i ka shkelur rregullat e mirësjelljes. Një seri prezantimesh të konsideruara si jo fatlume kanë bërë që kryesia e partisë të humbasë shpresat, se pas nominimit zyrtarisht të tij si kandidat Trump, mund të detyrohet përmes një lloj procedure disiplinare të partisë.

E çfarë bën Trump?

Trump e tregon veten se nuk i bëjnë përshtypje turbulencat brenda partiake. Fushata e tij elektorale për postin e presidentit, siç tha ai në Florida, “asnjëherë nuk ka qenë kaq unanime”.

Numri i republikanëve që për protestë janë shkëputur nga Trump-i, ndërkohë është rritur. Deputeti republikan Adam Kinzinger, një veteran i aviacionit ushtarak, i tha televizionit CNN, se Trump ka “i ka kaluar shumë kufij”. Ai tha se nuk do ta mbështesë më gjatë kandidatin – “pavarësisht, se çfarë çmimi mund të ketë kjo për të”.

“Bye, bye Trump”

Më parë republikania dhe shefe e koncernit të IT-së, Meg Whitman, deklaroi, se ajo do të mbështesë rivalen e trump-it, Hillary Clinton. Sipas saj “populisti i djathtë Trump është një “demagog i pandershëm”, i cili po ndjek një rrugë mjaft të rrezikshme”, kështu e argumentoi ajo vendimin e saj në gazetën “New York Times”.

Qarkullojnë fjalë, se poliitkanët drejtues të republikanëve janë duke menduar për një alternativë ndaj Trump-it. Televizioni ABC njofton, se kryesia e partisë është aq “e zhgënjyer dhe e irrituar”, sa po mendon për një tërheqje të papritur të kandidatit. Deri në zgjedhjet më 8 nëntor republikanët mund të nominojnë një tjetër kandidat. Kjo megjithatë do të ishte e ndërlikuar.

Në një sondazh të publikuar së fundi nga televizioni Fox News, Clinton ka mundur ta forcojë avantazhin e saj kundrejt Trump-it me dhjetë përqind. Ky sondazh rezulton me kuotën 49 përqind për Clinton-in dhe 39 përqind për Trump-in./DW