E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Nishani i përgjigjet PS/Mos deformoni të vërtetën. Uroj që zgjedhjet të jenë të lira

3 Gusht 2016, 12:03, Aktualitet CNA

Presidenti Bujar Nishani ka reaguar ndaj akuzave të Partisë Socialiste në lidhje me dekretin e tij për caktimin e 11 Shtatorit si datën për zhvillimin e zgjedhjeve për postin e Kryetarit të Bashkisë së Peshkopisë.

Sipas deklaratës, Kreu i Shtetit ka zbatuar me përpikmëri detyrimet kushtetuese dhe ato ligjore. Institucioni i Presidentit sqaron se Gjykata Kushtetuese ka njoftuar më 1 Gusht Kreun e Shtetit në lidhje me vendimin e marrë pas ankimit të depozituar nga Shukri Xhelili, që kërkonte rikthimin në detyrën e Kryebashkiakut.

Deklarata e Institucionit të Presidentit

Institucioni i Presidentit të Republikës mbetet i çuditur nga deklarata e subjektit politik Partia Socialiste e Shqipërisë në kundërshtim të Dekretit të Presidentit për caktimin e datës së zgjedhjeve për Kryetar të Bashkisë Dibër.

Kjo deklaratë nuk është serioze dhe deformon të gjitha përcaktimet ligjore, kushtetuese dhe institucionale.

Presidenti Republikës, bazuar në detyrimet e Tij kushtetuese, si dhe dispozitave të Ligjit Nr. nr. 10019, datë 29.12.2008, ?Kodi Zgjedhor i Republikës së Shqipërisë?, i ndryshuar, ka vendosur të dekretojë datën e zgjedhjeve vendore për Kryetar Bashkie të Bashkisë Dibër, të Qarkut Dibër.

Fillimisht informojmë dhe sqarojmë opinionin publik që Gjykata Kushtetuese ka njoftuar Institucionin e Presidentit të Republikës zyrtarisht, me shkresën me Nr. Prot. S-30, datë 1 gusht 2016, se kjo Gjykatë ka rrëzuar kërkesën e zotit Shukri Xhelili duke lënë në fuqi Vendimin e Këshillit të Ministrave për shkarkimin e tij.

Në këtë kuadër, përmes kësaj shkrese jemi informuar se data e vendimit të Gjykatës Kushtetuese është 1 gusht 2016, nga ku dhe fillon përllogaritja e datës së zhvillimit të zgjedhjeve vendore në këtë Bashki, të cilat në çdo rast janë vetëm; data 4 shtator ose 11 shtator 2016.

Për pasojë, data e përcaktuar në dekretin e Presidentit të Republikës, korrespondon me afatet ligjore të përcaktuara në nenin 10, pika 3 të Kodit Zgjedhor.

Rrjedhimisht, është lënë në fuqi Vendimi i Këshillit të Ministrave, nr. 361, datë 13.05.2016, ?Për shkarkimin nga detyra të kryetarit të Bashkisë Dibër, zotit Shukri Xhelili?, vendim i cili kujtojmë se është botuar në Fletoren Zyrtare, me nr. 81, të datës 17 maj 2016.

Në këto kushte, bazuar edhe në nenin 10, pika 3 të Kodit Zgjedhor, Presidenti i Republikës, brenda 48 orëve nga marrja e njoftimit zyrtar mbi datën e vendimit të Gjykatës Kushtetuese, dekretoi më datë 2 gusht 2016 datën e zhvillimit të zgjedhjeve për Kryetar të Bashkisë Dibër.

Institucioni i Presidentit të Republikës i shpreh keqardhjen opinionit publik për përhapjen tek ai të informacioneve të pavërteta rreth përcaktimeve ligjore dhe kushtetuese që rregullojnë organizimin e zgjedhjeve në vend si dhe mbi përmbushjen e detyrimeve institucionale të Presidentit të Republikës në këtë proces.

Presidenti uron dhe kërkon zhvillimin e lirë, të drejtë dhe të ndershëm të procesit të zgjedhjes së Kryetarit të Bashkisë Dibër. /citynews/