E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Pazaret/ A do të pranojë Rama të lëshojë Ministrinë e Brendshme për atë të Drejtësisë?

3 Gusht 2016, 10:05, Aktualitet CNA

Një nga pazaret që mund të zhvillohet mes Kryeministrit Edi Rama dhe Kryetarit të Kuvendit Ilir Meta është ai për postin e ministrit të Brendshëm. Duke pasur parasysh peshën që ka kjo ministri, veçanërisht përsa i takon proceseve zgjedhore, LSI do të tentojë që të marrë drejtimin e saj, duke qenë e gatshme që të heqë dorë nga një prej dikastereve që drejton tani.

Një ditë më parë, Meta tha se do të kontribuojë për një proces zgjedhor të lirë dhe të ndershëm, duke iu përgjigjur në këtë mënyrë kushtit të vendosur nga kreu demokrat Lulzim Basha, që ripërsëriti kërkesën për qeveri teknike si kusht për të garantuar këtë proces.

Por në anën tjetër Meta u tërhoq nga skenari për Qeveri teknike, sikundër deklaroi vetë, po ditën e djeshme. Atëherë si mund të kontribuojë LSI për zgjedhje të lira dhe të ndershme?

Një nga skenarët është ai që LSI të marrë drejtimin e Ministrisë së Brendshme.

Me lojën e bërë për reformën në drejtësi, ku Ilir Meta u shfaq dhe morri meritat si njeriu i konsensusit, për faktin se ai dhe forca politike kanë marrë rolin e balancuesit mes dy partive më të mëdha politike, PD dhe PS. Madje Meta është falenderuar më shumë se një herë nga kreu demokrat Lulzim Basha për konsensualitetin e tij të treguar në rastin e reformës në drejtësi.

Ndoshta nisur nga ky pozicion Meta ka menduar që të japë garancinë e tij për zgjedhje të lira dhe të ndershme, duke kërkuar drejtimin e Ministrisë së Brendshme. Madje burimet shprehen se për këtë post, LSI ka gati dy kandidatura, Ylli Manjanin që lëviz nga posti i ministrit të Drejtësisë, dhe Luan Ramën, që aktualisht është anëtar i Komisionit Parlamentar për Sigurinë.

Burime nga mazhoranca bëjnë të ditur se kjo ka qenë edhe një nga pikat e diskutuara mes Ramës dhe Metës edhe në takimin e fundit mes tyre, ku kreu i LSI ka ofruar të heqë dorë nga drejtimi i Ministrisë së Drejtësisë, duke marrë drejtimin e Ministrisë së Brendshme.

Megjithëse deri më tani, Kryeministri Edi Rama nuk ka pranuar largimin e Sajmir Tahirit nga posti i ministrit të Brendshëm, burimet shprehen se oferta që i është bërë nga aleati i tij në qeverisje është që ministri aktual i Brendshëm, të drejtojë ministrinë e Drejtësisë, post ky që mbahet nga Ylli Manjani.

Tashmë nuk dihet nëse kjo zgjidhje do të pranohet nga Rama, por edhe nga opozita, e cila kushtin që ka është Qeveria teknike. /citynews/