E fundit!

14:44 Editorial

"Terroristët" e rrjeteve sociale duhen çuar para drejtësisë

Prej ditësh bizneset në Shqipëri u përballën me një fo...

Presioni ndërkombëtar për miratimin e 7 ligjeve brenda Gushtit/Çfarë pritet të ndodhë në Vjeshtë?

31 Korrik 2016, 09:03, Aktualitet CNA

Ambasadorët e SHBA dhe BE në Tiranë, përkatësisht Donald Lu dhe Romana Vlahutin, janë riaktivizuar sërisht, me po të njëjtën energji, për të bindur palët politike në vend, në mazhorancë dhe opozitë, të miratojnë sa më parë 7 pr/ligjet që përbëjnë paketën e reformës në drejtësi.

Fillimisht Ambasadorët këmbëngulën për miratim të pr/ligjeve brenda Korrikut, por kur e panë të pamundur një gjë të tillë, po ushtrojnë presion, që ato të miratohen brenda Gushtit. Në fakt muaji gusht është pushim për Kuvendin e Shqipërisë, dhe sesioni i ri nis të hënën e parë të shtatorit.

Por Kuvendi zyrtarisht nuk ka mbyllur punimet, ndërsa palët po negociojnë nëse 7 pr/ligjet mund të miratohen më 11 Gusht apo jo, ditë kjo kur edhe ndryshimet Kushtetuese të miratuara më 22 Korrik, hyjnë në fuqi.

Kryeministri Rama ashtu sikundër në rastin e reformës në drejtësi, gjithçka ia ka lënë në dorë Ambasadorëve, të cilët kanë zhvilluar negociata intensive sa me Kryetarin e Kuvendit ashtu edhe me opozitën.

Të hënën pritet një mbledhje e Komisionit Parlamentar për Reformën në Drejtësi në lidhje me draftet. Por Oerd Bylykbashi, kryenegociatori i PD-së, e shikon të pamundur miratimin e drafteve ligjore më 11 Gusht, duke dhënë si arsyetim afatet kushtetuese, që nuk lejojnë një gjë të tillë.

Atëherë lind pyetja pse gjithë ky nxitim i ndërkombëtarëve për miratimin e drafteve brenda Gushtit, kur dihet se sesioni i ri parlamentar nis në shtator dhe draftet mund të miratohen në një nga seancat e muajit të ardhshëm?

Edhe sikur ndryshimet të miratohen në fillim të shtatorit, vonesat për hyrjen e tyre në fuqi do të jenë maksimumi me një vonesë 2-3 javëshe, në dallim nga rasti kur ato të miratohen në Gusht.

Referuar edhe faktit se institucionet e reja të Drejtësisë pritet të hyjnë në funksion në fillim të vitit tjetër, kjo të bën të dyshosh se një tjetër arsye kanë Ambasadorët sepse po i shtyjnë palët të miratojnë sa më shpejt paketën ligjore.

Duket se situate e brishtë politike dhe krijimi i ndonjë krize në qeverisje, është një nga arsyet sepse ndërkombëtarët, më konkretisht Ambasadorët e SHBA dhe BE po shtyjnë palët për të përmbyllur konsensusin për Drejtësinë, me miratimin e 7 ligjeve.

Megjithëse çështjet trajtohen të ndara, pra votat për drejtësinë dhe ato për Qeverinë, një krizë politike në Kuvend me tërheqjen e LSI-së nga Qeveria apo me një votëbesim nga Rama për Qeverinë, mund të çojë në rrëzimin e saj, çka do të thotë se vendi ose shkon në zgjedhje të parakohshme, ose krijon një Qeveri teknike.

Në të dy rastet, proçesi për Drejtësinë mund të pësojë një stopim, çka duket se është e papranueshme për ndërkombëtarët. Në një situatë të tillë duket se Ambasadorët duan të përmbyllin këtë proçes, dhe më pas duket se politika shqiptare do të jetë e lirë për të vijuar lojrat e saj me qeverinë. /citynews/