Thellohet kriza në mazhorancë/ PD-PS bëhen bashkë në Gjirokastër, përplasje me kryebashkiaken e LSI

21 Qershor 2016, 07:34, Aktualitet CNA

Kriza mes Partisë Socialiste dhe Lëvizjes Socialiste për Integrim, sa vjen edhe thellohet në pushtetin lokal. Pas përplasjeve të forta që ndodhën në Durrës disa javë më parë, dje PS dhe PD janë bërë bashkë kundër LSI në Gjirokastër. Që prej muajit prill, marrëdhëniet mes dy forcave kryesore të koalicionit nuk janë fort të mira, gjë që ka bërë që kriza të shtrihet edhe në pushtetin lokal.

Dje ishte planifikuar të miratoheshin një sërë vendimesh në këshillin bashkiak, por pati përplasje shumë të forta në radhët e socialistëve dhe të anëtarëve të LSI. Dy këshilltarë të PS kanë kundërshtuar rendin e ditës, me argumentin se gjithçka është diktuar nga kryebashkiakja e LSI, Zamira Rami. “Sot” shkruan se ata kanë akuzuar kryebashkiaken se nuk kishte futur në rend të ditës ato që ishin parashikuar në komisione, por kishte vendosur të hidhte në votim projektvendime të tjera të padiskutuara më parë.

Kjo ka irrituar këshilltarët e PD dhe PS duke sjellë dhe përplasje të forta. Ata akuzuan Ramin se çdo gjë ishte diktuar prej saj dhe ata nuk e pranonin. Për këtë arsye, dy këshilltarë të PS dhe ata të PD braktisën mbledhjen. Madje, demokratët kërcënuan se do bëjnë një padi në prokurori për falsifikim të rendit të ditës.

Pas largimit të tyre, mbledhja u shty sepse nuk ishte kuorumi i mjaftueshëm. Por përpara se të ndodhte një gjë e tillë pati debate shumë të ashpra sa i takon shkarkimit të ish-drejtorit të Ujësjellës-Kanalizimeve, shkarkimi i të cilit shkaktoi bujë pasi u shkarkua nga kryebashkiakja Zamira Rami në prani të mediave. Ishte përfaqësuesi i PD, Roland Bejko, ai që kërkoi nga Rami që të kërkojë ndjesë për veprimet e saj, por që nuk pati asnjë reagim.

Më pas mbledhja nisi me prezantimin e rendit të ditës, ku 2 këshilltarë të PS shfaqën pakënaqësi të madhe ndaj kryebashkiakes së LSI, duke dëshmuar qartë se sa të nxehta janë marrëdhëniet mes PS dhe LSI, sidomos në pushtetin vendor. Gjirokastra është një ndër qytetet ku dy forcat kryesore të koalicionit kanë pasur vazhdimisht përplasje të forta. Në shumë raste, përfaqësuesit e secilës forcë akuzojnë njëri-tjetrin për moszbatim të marrëveshjes para zgjedhjeve, ose për refuzim të futjes së militantëve në punë. Edhe dje u dëshmua qartë kriza në koalicionin qeverisës.