Skandali në Shkodër/ Dëshmitë e fëmijëve, djali i ish-drejtoreshës abuzoi me të miturat

20 Maj 2016, 09:47, Aktualitet CNA

Të tjera detaje kanë dalë në dritë nga abuzimi seksual në jetimoren e Shkodrës. Një nga vajzat e mitura dëshmon para psikologut të Avokatit të Popullit se janë abuzuar seksualisht nga djali i ish-drejtoreshës së kësaj qendre, Albana Llazani, gjatë një ekskursioni të organizuar në Velipojë dhe Razëm. Sipas kësaj dëshmie dy fëmijë të punonjëseve të kësaj qendre, duke qenë jashtë vëmendjes së punonjësve kanë ushtruar dhunë fizike ndaj fëmijëve dhe në raste të tjera djali i drejtoreshës me iniciale B. Ll, ka ngacmuar seksualisht fëmijët e seksit femër me moshë më të vogël se ai.

Gjithashtu mësohet se fëmijët e kesaj qendre janë dhunuar psikologjikisht e fizikisht. Ndërkohë, tre vajzat e moshës 6, 8 dhe 11 vjeç kanë dëshmuar në Prokurori duke treguar se abuzimi ka ndodhur brenda jetimores. Sipas dëshmisë së tyre bërë përpara Oficerëve të Policisë Gjyqësore, bëhet me dije se djemtë më të rritur i kanë detyruar të miturat të shohin filma erotike. Ka qenë dëshmia e vajzave të dëmtuara të cilat kanë hedhur dritë mbi fakte të tjera të dhunës së ushtruar ndaj tyre. Nga ana tjetër bëhet me dije se janë rrahur brutalisht në ambientet e jetimores. Ndërkohë, sipas raportit të prokurorisë, vajzat e mitura rriheshin me shkopinj dhe këmbë karrigesh nga fëmijë të tjerë, por edhe nga punonjës të jetimores.

Në lidhje me këtë skandal janë arrestuar 5 punonjëse të jetimores së Shkodrës, Policia bën të ditur se në prang janë vënë, Albana Llazani, ish-drejtoreshë e Qendrës Rezidenciale për Fëmijë, Shkodër dhe 4 punonjëse të tjera, Rafaela Camaj, Shpresa Nimani, Najda Rramolli dhe Violeta Marku. Ata dyshohen se kanë konsumuar elemente të veprave penale të ?Shpërdorimit të detyrës? dhe ?Keqtrajtimit të të miturve?.

Ndërsa, drejtori i qendrës së fëmijëve, Gëzim Mahmutaj, është shprehur se kjo është një ngjarje shumë e rëndë dhe tashmë organet kompetente po hetojnë.

Në lidhje me skandalin, mjaft e shqetësuar është shprehur edhe nëna e 2 fëmijëve të strehuar në këtë qendër, Natasha Bajrami, e cila thekson se nuk e di nëse të bijat janë viktima të këtij abuzimi./ Citynews